AMED - Mehmet Yildirim ku di 17 saliya xwe de hat girtin heta niha 4 caran ketiye greva birçîbûnê. Dayika wî Hizal Yildirim, xwest tecrîd bi dawî bibe.
Çalakiyên greva birçîbûnê yên li dijî tecrîdkirina Rêberê PKK'ê Abdullah Ocalan didomin. Li girtîgehan jî ligel çalakiya greva birçîbûnê ya bêdem û nedorveger a bi hezaran girtiyî, duh 15 girtiyan çalakiya greva birçîbûnê veguherand rojiya mirinê. Yek ji girtiyên di greva birçîbûnê de jî Mehmet Yildirim e. Yildirim, li Girtîgeha Tîpa T a Bafrayê di greva birçîbûnê de ye. Yildirim, 8 sal in di Girtîgeha Tîpa T a Bafrayê de ye û heta niha 4 caran ketiye greva birçîbûnê.
Yildirim, di sala 2009'an de di 17 saliya xwe de hatiye girtin û 16 sal ceza lê hatiye birîn. Wexta li Girtîgeha Tîpa D a Amedê bûye, di sala 2011'an de dema li Colemêrgê 12 HPG'î jiyana xwe ji dest didin agir berdide bedena xwe. Demekê li Nexweşxaneya Zanîngeha Dîcleyê tê tedawîkirin û piştî tedawiyê wî dîsa dibin girtîgehê.
4 CARAN KETIYE GREVA BIRÇÎBÛNÊ
Dayika wî Hizal Yildirim, bilêv kir ku kurê wê di dawiya meha Sibatê de ketiye greva birçîbûnê. Yildirim, anî ziman ku piştî kurê wê agir berdide bedena xwe sewqî Girtîgeha Tîpa T a Bafrayê tê kirin û got: "8 sal in ji bo sewqî Girtîgeha Amedê bê kirin min 7 daxwazname û kurê min jî 12 daxwazname nivîsandine. Lê belê bi tu awayî nehatin bersivandinç" Dayik Yildirim, diyar kir ku 8 sal in kurê wê li Girtîgeha Bafrayê ye û di nav 8 salan de 4 caran ketiye greva birçîbûnê. Dayik Yildirim, anî ziman ku kurê wê di sala 2012'an de 18 rojan, di sala 2014'an de 26 rojan, di sala 2016'an de 38 rojan di greva birçîbûnê de maye û niha jî nêzî 3 meh in di greva birçîbûnê de ye.
‘EM Ê NASEKININ Û EM Ê NESEKININ JÎ'
Dayik Yildirim, diyar kir ku piştî kurê wê sewqî Girtîgeha Bafrayê hatiye kirin, ji ber dûr e û ji ber rewşa aborî nikare biçe girtîgehê. Yildirim, anî ziman ku wexta ew diçin girtîgehê jî ji dêvla ew moralê kurê xwe baş bikin kurê wê moralê wan baş dike û got: "Di dema hevdîtinê de em tim behsa derve dikin. Dixwaze behsa gund, behsa Amedê bikim. Pir zihîf bûye. Divê em bibin dengê wan. Dixwazin em dayik bibin dengê wan. Em jî nasekinin û em ê qet jî nesekinin. Bila ne dayikên kurd ne jî yên tirk negirîn. Em aştiyê dixwazin. Wexta zarokên me bimirin tu wateyeke jiyanê jî namîne."
‘BILA TECRÎD BI DAWÎ BIBE'
Dayik Yildirim, diyar kir ku piştî du salan mehek berê kurê xwe dîtiye. Yildirim, ji bo tecrîdkirina Rêberê PKK'ê Abdullah Ocalan bi dawî bibe bang li Serokomar û Wezîrê Dadê kir.