ÎZMÎR - Xizmên girtiyan tevî astengiyênk polîsan, li pêş Girtîgeha Menemenê rûniştintin û daxuyanî dan çapemeniyê. Malbatan xwest dewlet alîgirê jiyanê be. Malbatan bal kişand ser rewşa zarokên xwe û gotin: "Xwarina em dipijînin di qirika me de naçe xwar."
Malbatên girtiyan, di pêşengiya EGE- TUHADER'ê de bi armanca piştgiriyê bidin girtiyên li dijî tecrîdkirina Rêberê PKK'ê Abdullah Ocalan li pêş Girtîgeha Tîpa T a Menemenê daxuyaniyê dan çapemeniyê. Komeleya Piştevanî û Alîkariya Malbatên Girtiyan EGE-TUHAYDER, çalakiya rûniştinê pêk ani û daxuyanî dan. Beriya çalakiyê polîs û eskeran kom dorpêç kir û destûr nedan çalakiye pêk bînin. Lê malbat ji dolmîş û otobusan daketin û nêzî 4 kîlometre meşiyan û hatin ber Girtîgehê. Di meşê de Parlamenterê HDP'ê yê Îzmirê Murat Çepni, Rêveberên HDK'ê, Dayikên Aştiyê û gelek kesên din amade bûn. Beriya çalakiya rûniştinê daxuyanî dan. Li ser navê malbatan Hevseroka EGE- TUHAYDER'ê Selma Altan, diyar kir ku di salên borî de di çalakiyên greva birçîbûnê de gelek kesan ji yana xwe ji dest dan û wiha got: "Em bûn şahid ku di çalakiyên berê de gelek mirovan jiyana xwe ji dest dan. Niha di pêşengiya Leyla Guven de disa çalakiya grevê dest pê kiriye. Heta niha 7 kesan li girtîgehan bi giştî 8 kesan jiyana xwe ji dest dan. Nêzî Hezar û 500 girtî hatine sînorê mirinê. Li girtîgehê parastina jiyanê erka dewletê ye. Divê dewlet vê erka xwe pêk bîne. Sedema grevê tecrîdkirina Abdullah Ocalan a li Îmraliyê ye. Ger ku ev tecrîd bi dawî bibe girti wê dawî li çalakiyê bînin. Divê dewlet alîgirê jiyanê be û jibo jiyana girtiyan gavan bavêje."
GER KU HÛN DAXWAZAN PÊK NÎNIN HÛN SÛC DIKIN
Parlamenterê HDP'ê Murat Çepnî ji êrîşa polîsan a li dijî çalakiya li Amedê şermezar kir û wiha got: "Em dixwazin tecrîd bi dawî bibe û jiyan ji nûve geş bibe. Li vi welatî mirov ji bo şer raweste bedena xwe daye ber mirinê. kesên ketine grevê hatine asta krîtîk. Divê teqez tecrîda li Îmraliyê bi dawî bibe. Abdullah Ocalan bi parêzer û malbata xwe re hevdîtin bike. Bi hezaran mirov mafê qanûnî û hiqûqi dixwazin. Malbat îro li vir vê qerînê tînin ziman. Her mirinek bêtir dijminantiyê kûr dikin. Her mirinek birînê bêtir kûr dike. Em bang dikin em dibêjin vê daxwazê pêk bînin û rê li pêş mirinê bigirin. Ger ku hûn vê yekê pêk nînin hûn dibin şirîkê kuştinê. Hûn sûc dikin. Hûn li hemberî daxwazên demokratîk sûc dikin. Deng û qerina dayikan bibhîzin.
HÛN ÇIMA QERÎNA DAYIKAN NABIHÎZIN
Dayika Nezîr Gumuş ê li Girtîgeha Tîpa T -1 a Bandirma ku ji 1'ê Adarê de di grevê de ye, Hanife Gumuş jî anî ziman ku ew naxwazin cenaze ji girtîgehan derkevin û wiha got: "Hikûmetê çav û guhê xwe ji daxwazên girtiyan re girtiye. Ev zulm wê heta kengî bimeşe. Hûn çima qêrîna dayikan nabihizin.
XWARIN DI QIRIKA ME DE NAÇE XWAR
Dayika Mehmet Mençîk a li Girtîgeha Tîpa T-2 a Bandırma Filiz Mencik jî bertek nîşanî hikûmetê da û wiha got: "Xwarina em dipijînin êdî di qirika me de naçe xwar. Ez êdî nikarim li malê xwarin bixwim. Ji ber ku ez dizanim tev birçîne. Li vi welatî kesên tecawizkar û kujer tên berdan. lê zarokên me di şertên giran de tên girtin. Ka edalet û hiqûq ev e?"