AMED - YSK'ê daxuyand ew ê mazbatayê nedin kesên bi KHK'yan hatine îxrackirin. Amediyan bertek nîşanî vê biryara YSK'ê dan û gotin: "Ev rezaletî, bêedlaetî, tayînkirina qeyûman û xespkirina vîna gel e."
Desteya Hilbijartinê ya Bilind (YSK), daxuyand ku ew ê mazbatayên nedin kesên bi KHK'yan hatine îxrackirin. Yek ji kesên ku dê YSK mazbatayê nedê jî Zeyyat Ceylan e ku li naveya Rezan a Amedê namzetê HDP'ê bû û bi bi rêjeyeke mezin hatibû hilbijartin. Lê belê ji ber bi KHK'ê ji mamostetiyê hatiye îxrackirin, YSK'ê daxuyand ku ew ê mazbatayê nedinê. Amediyan bertek nîşanî vê biryara YSK'ê da.
Rahmetûllah Dûrmûş (55) anî ziman ku YSK'ê pêl qanûnan û biryarên xwe kiriye û got: "Em dixwazin rojek berî rojekê mazbatayên hevşaredarên me bidin. Em vê biryarê şermezar dikin."
Mûstafa Akyuz jî got: "Piştî vê saetê YSK ne saziyeke serbixwe û bêalî ye. Eger serbixwe û bêalî bûna niha ji zûv de mazbataya Ekrem Îmamoglû dabûyê. Tê gotin wê hilbijartinê ji nû ve bikin. Ev tişta tê kirin ne etîk e. Ji bo navçeya Rezanê jî heman tişt tê gotin. Yanî ev ne vîna gel e, ev ne hilbijartinek azad e, ev ferzkirin e. Madem dê tiştek wisa bikirana nexwe bila hilbijartin nekirana."
'HEYFA XWE JI HDP'Ê DISTÎNIN'
Mehmet Halîm Guler jî destnîşan kir ku ev biryar tê wateya feraseta qeyûman û got: "Berê digotin 'em ê qeyûman tayîn bikin', niha kirasek jê r dîtin û qeyûm tayîn kirin. Ji ber li rojavayê Tirkiyeyê bajarên mezin ji dest wan çûn, pir li zora wan diçe. Niha heyfa wê ji HDP'ê distînin. Ji YSK'ê dipirsim; madem te yê mazbata nedana nexwe çima tu namzetya wan qebûl dikî? Ma hayê te ji qanûnên te tune ye, an jê ferman e? Ev tê wateya ku HDP'ê û kurdan naxwazin. Ev tê wateya binpêkirina vîna gel, ev heqaret e."
'AKP PARTIYEKE HÎLEKAR E'
Mehmet Çelîk jî got: "AKP, partiyeke hîlekar e. Îro jî hîleyek kir. Pêşî bila li gor qanûnên xwe tev bigere. Em tiştekî wisa qebûl nakin. Tu kes jî qebûl nake. Erdogan dibêje 'Her tişt ê min e. Ez serok im. Li Tirkiyeyê ez bêjim çi wê ew be.' Eger gel te şandibe wir, gel dikare te ji wir daxîne jî."
'MAZBATAYA BIDIN XWEDIYÊ WAN'
Mehmet Alkan jî got: "Ev neheqiye. Madem bisabiqe ne, nexwe çima tu namzetiya wan qebûl dikî? Namzetan hemûyan sicîla xwe dabû YSK'ê. Diviya di serî de qebûl nekirina. Niha gel ew hilbijartine, lê hîn nû aqil dikeve erê YSK'ê. Divê mazbatayê bidin namzetên ku gel ew hilbijartine. Bila dev ji xespkirina gel berdin. Li Tirkiyeyê bi navê edaletê tiştek jî nemaye. YSK, êdî ne bêalî ye. YSK hat mehkûmkirin."
Mamoste Gokçen Gezen jî got: "Ev ne biryarek adil e. Nayê qebûlkirin. Divê demildets mazbatayan bidin xwediyê wan."
'REZALETÎ YE'
Melike Ateş got: "Biryara YSK'ê ne rast e. Vîna me nahesibînin. Ev nayê qebûlkirin."
Engîn Osmanoglû jî got: "Madem wê nehatan qebûlkirin ji bo çi daxilî hilbijartinê hatin kirin. Madem tev li hilbijartinê bûne, nexwe divê mafê wan bê dayîn. Ev biryar ne biryara YSK'ê bi tenê ye. Ji jor de hatiye. Ev ne maf e, rezaletî ye."
MA / Esra Solîn Dal