AMED - Malbatên Girtiyan, bi armanca piştgiriyê bidin çalakiya zarokên xwe yên li girtîgehan di grevê de û daxwazên wan bînin ziman, ji bo 3 rojan li Baroya Amedê dest bi çalakiya greva birçîbûnê kirin.
Berxwedana Hevseroka Kongreya Civaka Demokratîk (KCD) û Parlamentera HDP'ê ya Colemêrgê Leyla Guven a li dijî tecrîdkirina Rêberê PKK'ê Abdullah Ocalan dest bi greva birçibûnê ya bêdawî û bêdorveger kiriye di roja 154'emîn de didome. Li Hewlêrê berxwedana Endamê HDP'ê Nasir Yagiz ê bi heman armancê destpê kir di roja 141'emîn de didome. Berxwedana li Strasbourgê ya 14 Çalakgeran û li Galler Îmam Şîş di roja 115'emîn de didome. Çalakiya girtiyên girtîgehên Tirkiye 116 roj in didome. Piştî 1'ê Adarê bi hezaran girtî dest bi greva birçîbûnê kirin û çalakiya wan di roja 41'emîn de didome. Malbatên ku zarokên wan li girtîgehan li dijî tecrîdkirina Rêberê PKK'ê Abdullah Ocalan ketine grevê jî bi armanca daxwazên zarokên xwe bînin ziman ketin nava liv û tevgerê. Xizmên girtiyan ên li Amedê ji bo daxwazên zarokên xwe bînin ziman ji bo 3 rojan li Baroya Amedê dest bi çalakiya greva birçîbûnê kirin. Gelek xizmên girtiyan di çalakiyê de cih girtin. Malbatên ku di çalakiyê de rûniştin wêneyên zarokên xwe hembêz kirin û daxwazên zarokên xwe parve kirin.b Malbatan di çalakiyê de diruşmeya “Bijî berxwedana zindanan” û “Girtiyên siyasî rûmeta me ye" berz kirin. Ji ber çalakiyê polîsan avahiya Baroyê dorpêç kirin.
Li ser navê malbatan Dayika Aştiyê û xizma girtiyan Nezahat Teke, diyar kir ku hemû dayikên li Baroyê xwedî êş in û wiha got: "Em ji bo daxwazên zarokên xwe bînin ziman em hatine baroyê. Baro cihê hiqûq û edaletê ye. Em jî wekî dayikên hemû girtiyan rewşa zarokên xwe dibînin. Em dibêjin em dikarin dengê xwe li ku bilind bikin û bigînin rayedaran. Leyla Guven îro 154 rojin li dijî tecrîdê di greva birçibûnê de ye. Bi mirinê re rû bi rû ye. Em jî ji bo zarokên me nemirin li vir dest bi nobedê digirin. Maden zarokên me birçî ne. Em ê jî li vir 3 rojan rûnên û birçî bin. Duh em çûn ziyareta zarokên xwe. Me rewşa zarokên xwe dît. Êdî xew nakeve çavê me. Ger ku mirin hewce me em birin. Em bang li hemû cîhanê dikin. Mafê her kesî heye. Ji girtîgehan 7 cenaze derketin. Destûr nedan ku malbat li gorî daxwazên xwe zarokên xwe defin bikin. Em êdî naxwazin malbat darbestên zarokên xwe pêşwazî bikin. Yên ku guh nedin daxwazên zarokên me wîcdanê wan tune ye. Bila baro jî li qusûra me nenere. Bila her kes êdî dengê me bibhîze. Tenê daxwazek me heye. Bila zarokên me nemirin."
Cîgira Seroka Baroya Amedê Gazal Bayram Koluman jî anî ziman ku daxwazên girtiyan rewa û hiqûqî ye û wiha got: "Em çalakiya malbatan a rûniştinê û greva birçîbûnê qebûl dikin û fam dikin. Yên herî zêde ji grevê dikevin bin bandorê malbatên girtiyan in. Tecrîdkirina Rêberê PKK'ê Abdullah Ocalan li dijî hiqûqê ye. Ji bo tecrîd bi dawî bibe hikûmet erka xwe pêk neaniye. Baroya me mafê mirovan diparêze û mafê jiyanê pîroz dibîne. Ji ber vê yekê çalakiyek li vir mafdar e. Ji ber ku yên li vir çalakiyê pêk tînin xizmên girtiyên di çalakiyê de ne. Daxwazên we rewa û mafdar e. Ji ber vê yekê ez çalakiyla we mafdar dibînim."
Rêveberê Baroyê Serdar Çelebî jî anî ziman ku hatina malbatan a baroyê nîşan dide ku baweriya mirovan a ji hiqûqê hêj bi dawî nebûye û wiha got: "Baro her dem li pişt malbatên girtiyan e. Wê ji niha û şûnde jî li pişt malbatên girtiyan be."