STENBOL - Îhsan Sînmîş ku piştî hat berdan û çalakiya xwe ya greva birçîbûnê li mala xwe didomîne, got: "Heta niha 8 mirovên me mirin. Berî hin cenazeyên din ji girtîgehan derkevin divê êdî dengê çalakiyê bê bihîstin. Êdî wext e ku her kes dakeve kuçe û kolanan. Eger em bisekin wê ji girtîgehan xeberên mirinê bên."
Piştî di 28'ê Adara 2018'an de qeyûm tayînî rojnameya Ozgurlukçu Demokrasî û Gun Matbaayê hat kirin, 21 kes hatibûn binçavkirin. Ji evan kesan yek jê jî xebatkarê matbaayê Îhsan Sînmîş ê 55 salî bû. Sînmîş, li girtîgehê tevî gelek girtîgehan li dijî tecrîda li Îmraliyê ketibû greva birçîbûnê, lê belê di 11'ê Adarê de hat berda û niha çalakiya xwe ya greva birçîbûnê lê malê didomîne. Sînmîş, ji 1'ê Adarê ve di greva birçîbûnê de ye.
‘BER ÇAVÊ MIN TARÎ DIBE'
Sînmîş, diyar kir ku êdî hêdî hêdî grev tesîrê li tenduristiya wî dike û niha ber çavê wî tarî dibe. Sînmîş, got: "Her wiha çongên
û madeya min diêşin. Bi şev ji xeynî ancax 2-3 saetan tenê dikarim rakevim. Ji xwe nikarim derkevim derve jî. Tim li malê me." Sînmîş, diyar kir ku her roj şerbet, dewê şor û 2 heb vîtamîna B12 dixwe û got: "Ji bo mêjî zirarê nebîne vîtamîna B12 dixwim. Lê eger wisa dewam wê mêjî zirarê bibîne. Rojê tenê 2- qedeh tiştên avî vedixwim. Ji xeynî wê tiştekî naxwim. Jixwe bixwazim bixwim bixwim jî dilê min ranake."
‘BILA EV BÊDENGÎ BI DAWÎ BIBE'
Sînmîş, bi bîr xist ku li girtîgehan 7 bi giştî 8 kesan li dijî tecrîîdê dawî li jiyana xwe aniye û got: "Divê êdî tu hevalên me tiştekî wisa nekin. Dikarin çalakiyên cuda bikin, lê divê dawî li jiyana xwe neynin. Çimkî jiyana wan hevalan ji bo me pir girîng e. A rast ev hevalên me bang li gerl dikin. Ji ber bêdengiya wan çalakiyên wisa dikin. Niha li girtîgehan bi hezaran mirov bedena xwe dane ber birçîbûnê. Lê kes nabihîse, nabîne. Jixwe dewlet wê naxe rojeva xwe jî. Dewlet bi zext û zoriyan dixwaze gel bitirsîne. Lê xwe dixapîne. Kesên di greva birçîbûnê de wê canê xwe bidin lê dev ji çalakiya xwe bernadin. Eger ji girtîgehan cenazeyeke din jî derkeve wê rewş veguhere tiştekî pir cuda. Êdî hew maye rojiyên mirinê dest pê bikin. Ji xeynî mirinê bedena hevalan pir texrîb bûye. Jixwe ev mirov ne di xema dewletê de ne. Jixwe dewlet tiştekî wisa dixwaze. Lê êdî divê gelê kurd, gelê tirk li dijî vê yekê dengê xwe bilind bike. Divê dawî li vê bêdengiyê bînin."
‘RABIN SER PIYA'
Sînmîş, bi bîr xist ku Hevseroka KCD'ê Leyla Guven 154 roj in di greva birçîbûnê de ue û got: "Bang li her kesên dibên em mirov in dikim. Divê êdî rayedarên dewletê, nivîskar, rojnamevanî parêzevanên mafên mirovên bêjin êdî bes e. Ma piştî cenaze derkevin h»n ê bêjin êdî bes e. 8 mirovên me dawî li jiyana xwe anîn. Berî ji girtîgehan hin cenazeyên din derkevin, divê her kes tev bigere. Heta ev tecrîd bi dawî nebe tu tişt pêk nayê. Lê heta kuderê dewam dike bila bike, em ê dev ji çalakiya xwe bernedin. Heta tecrîd neyê şikandin wê dewam bike. Bang li her kesî dikim . Êdî wext e ku her kes dakeve kuçe û kolanan. Eger em bisekin wê ji girtîgehan xeberên mirinê bên. Loma divê he rkes rabe ser piya."