MÊRDÎN – Namzetê Partiya Saadetê (SP) yê Rişmila Mêrdîn Enver Saglam, diyar kir ku li şûna 204 kesên ku mirî jî di navde hene deng avêtin sindoqan û wiha got: "Em li benda encama biryara Lijneya Hilbijartinê ya Bajar in. Ger ku em encamê nestînin emê heta Dadgeha Mafên Mirovan a Ewropa (DMME) biçin.
Piştî hilbijartina Rêveberiya Herêmî ya 31'ê Adarê ku li Tirkiye pêk hat, îtîraz didomin. Yek ji cihê ku îtîraz hatin kirin li Navçeya Rişmil a Mêrdînê ye. Partiya Saadetê (SP) bi sedema ku mirî jî di navde li şûna 204 kesan deng hatine avêtin serî li Lijneya Hilbijartinê ya Bajar da. Lê hêj îtîraz bi encam nebûye. Namzetê AKP'ê yê Rişmilê Hayrettin Demîr, bêyî ku li benda encama îtîrazê raweste mazbata xwe girt. Li gorî encamên ne fermî AKP bi 127 dengê zêde şaredarî bi dest xist. Partiya Saadetê diyar kir ku tevî mirî, esker, girtî û kesên li dervê welat li şûna 204 kesên nehatin ser sindoqê deng avêtine û ev yek tespît kirine. SP'ê serî li Lijneya Hilbijartina Bajar dan û li benda encamê ne. Namzetê Partiya Saadetê Yê Rişmilê (Yeşilli) Enver Saglam, têkildarî nelirêtiyê ji Ajansa Mezopotamya (MA) re axivî.
Saglam, anî ziman ku beriya hilbijartinê AKP'ê li Rişmilê her dem ew wekî xayinê welat tawanbar kir û wiha got: "Me di şertên ne wekhev de xebatên hilbijartinê kirin. Me li Rişmilê hilbijartin bi dest xist. Lê piştre hin kes ketin nava vî karî û encama sindoqan hat guhertin. Di hemam saetê de me tespît kir ku Qeymeqamê Navçeya Rişmilê Omer Bilgin li Lijneya Hilbijartinê ya Navçeyê ye. Bîlgîn ji kesên li wir re got Ajansa Anadolu (AA) agahniyên şaş digire. Piştî mudaxaleyan encama hilbijartinê hat guhertin. Piştî encam hatin guhertin AKP bi 127 dengan ket pêş me. Hilbijêran li ser 32 sindoqan dengê xwe dan. Me li ser 5 sindoqan nelirêtî tespit kir. Me tespît kir ku encamên sindoqên hêjmar 1016, 1025, 1026, 1027 û 1032 hatin guhertin. Me di van sindoqan de tespît kir ku li şûna 204 kesan deng hatine avêtin. Mînak di sindoqa 1032'an de 345 hilbijêr hene. Lê 343 kesan deng avêtiye. 30 kesên ku wekî hilbijêr tên dîtin li Sûriye dijîn. 15 kes jî esker û mirî ne. Li gel ku me ev yek tespît kir jî encam nehat guhertin. "
HEWCE BE EM Ê BIÇIN DMME'YÊ
Saglam, anî ziman ku ew ê têkoşîna xwe ya hihûqê berdewam bikin û wiha got: "Me serî li Lijneya Hilbijartinê ya Navçeyê da. Lê bêyî hincet red kir. Niha me serî li Lijneya Hilbijartinê ya Bajar daye. Em li benda encama wê ne. Ger ku pêwist be dê heta Dadgeha Mafên Mirovan a Ewropa (DMME) jî biçin. Bi taybeti em di sindoqa 1032'an de israr dikin. Qeymeqam Bilgin 45 rojan wekî endamê partiya siyasî tev geriya. Qeymeqam aşkere wekî xebatkarê AKP'ê xebitî.
MA / Ahmet Kanbal