SÊRT- Dê û bavên Agît Toprak ku li Girtîgeha Çorûmê 38 roj in di greva birçîbûnê de ye, diyar kirin ku ew dixwazin li ser axa xwe bi awayekî birûmet bijîn û got: "Divê em li dijî tecrîdê derkevin. Me bikujin jî û bigirin jî em ê van zext û zoriyan qebûl nekin." 

 

Çalakiya greva birçîbûnê ya Hevseroka Kongreya Civaka Demokratîk (KCD) û Parlementera HDP'ê ya Colemêrgê Leyla Guven ku li dijî tecrîdkirina Rêberê PKK'ê Abdullah Ocalan da destpêkirin ji 8'ê Mijdara 2018'an ve didome. Bi heman daxwazê li girtîgehan jî çalakiya greva birçîbûnê ya bi hezaran girtiyan didome. Ji girtiyên di greva birçîbûnê de yek jê jî Agît Toprak e. Toprak ê 21 salî 38 roj in li Girtîgeha Tîpa L a Çorûmê di greva birçîbûnê de ye. Toprak, 3 sal in bi îdiaya "endamtî û alîkariya rêxistinê" hatiye girtin. Bavê wî Îzettîn Toprak, xwest zext û zoriyên li girtîgehan bi dawî bibin û got: "Çi dibêjin bila bibêjin, em kurd in. Êdî bes e ji vê zilmê re. Ez bi zimanê xwe diaxivim. Ew bi zimanê xwe. Em li ser axa xwe ne. Gundê me şewitandin, em îşkence kirin. Me ji warê me derxistin. Em van zext û zoriyan qebûl nakin. Em jî dixwazin li ser axa xwe bi awayekî birûmet bijîn. Divê tecrîda li ser gelê kurd bi dawî bibe." 

 

‘DIVÊ EM LI DIJÎ TECRÎDÊ DERKEVIN' 

 

Bav Toprak, anî ziman ku rewşa kurê wî nebaş e û divê gelê kurd li dijî îşkence, zext û zoriyan derkeve û got: "Divê gelê kurd bibe yek. Divê em li dijî vê tecrîdê derkevin. Me bikujin jî û bigirin jî em ê van zext û zoriyan qebûl nekin." 

 

Dayik Muhabbet Toprak (48) jî anî ziman ku tevî kurê wê 8 kes li Girtîgeha Çorûmê di greva birçîbûnê de ne. Dayik Toprak, bang li gelê kurd kur û got: "Divê her kes xwedî li zarokên me derkeve. Divê em bibin dengê wan. Ez bang li dayikên tirk û kurd dikim. Em tenê aştiyê dixwazin. Em naxwazin ji girtîgehan cenaze derkevin."