Li Taxa Denîzlî ya navçeya Seyhan a Edeneyê, sîxurtî li zarok û ciwanên kurdan tê ferzkirin. Polîs, li nav kuçe û kolanan zarok û ciwanan disekinînin, belaheq û belasebeb wan derb dikin an jî binçav dikin. Yek ji van ciwanan jî Selman Şen e. Şen, di 14'ê Sibatê de hatiye binçavkirin û paşê bi şertê kontrolkirina edlî hatiye berdan. Şen, bilêv kir ku di dema binçavkirinê de polîsan ew derb kiriye û gef lê xwarine. Şen, anî ziman ku tevî wî 7 zarokên emrê wan di biniya 18 salan de jî hatine binçavkirin û polîs ji wan re gotiye: "Mezinan ev nav li we kiriye, lê serê we xistine belayê. Hûn jî serê wan têxin belayê. Bila serê we nekeve belayê." 

 

Şen, got: "Li dozgeriyê em bi kontrolkirina edlî hatin berdan. Ji bo îmzeyê hefteya borî çûm qereqolê. Lê karmendê li wir ji min re got 'îstixbarat dixwaze te bibîne.' Min qebûl nekir. Karmendê din jî got 'Eger hûn dixwazin amûrên we yên hatine desteserkirin bigirin divê hûn bên cem me. Alîkariya me bikin, da em jî alîkariya we bikin.' Bi vî awayî xwestin ez biçim cem îstixbaratê." 

 

'AN TU YÊ ALÎKARIYA ME BIKÎ, AN JÎ WÊ CIWANTIYA TE HEBA BIBE' 

 

Şen, diyar kir ku piştî vê tim polîs wî dişopînn. Şen got: "Polîs tim li taxê ne. Beleheq me disekînin, derb dikin, heqaret dikin û bi mirinê gefan li me dixwin. Dixwazin ciwanan bikin sîxur. Wexta tiştek li taxê biqewime polîs tim tên cem min, min derb dikin. Dibêjin 'Selman çavê me li ser te ye. Me te li filan derî dît. An tu yê alîkariya me bikî an jî wê ciwantiya te heba bibe.' Her wiha çend roj berê tiştek li taxê qewimî. Polîsan bi awayekî dijwar li zarokekî biçûk xistin û jê re gotin 'Ya tu yê navekî ji me re bêjî en jî em ê te bikujin.'" 

 

Şen, diyar kir ku tu carî ew ê berbayî van pêkanînên sîxurtiyê nebin û ji ber vê ew ê polîsan gilî bike. 

 

MA / Hamdullah Kesen