* Prof. Dr. Gençay Gursoy, diyar kir ku di hilbijartinê de herî zêde stratejiya HDP'ê bi ser ketiye û divê bê teqdîrkirin. Nivîskar Aydin Engîn jî got: "Bajarên kurdan ji qeyûman hatin paqijkirin."
* Fesîh Tekîn, li Girtîgeha Tarsûsê 88 roj û birayê wî Zahît Tekîn, li Girtîgeha Wanê 34 roj in li dijî tecrîdê di greva birçîbûnê de ne. Zahît Tekîn, nameyek şand û di nameya xwe de got: "Ji bo hilatina rojê em li ber xwe didin."
* Serokê Desteya Rêvebir ê TMMOB'ê Emîn Koramaz, diyar kir ku li herêmê di şexsê HDP'ê de gel xwedî li bajarên xwe derketiye û Serokê Giştî yê ÎMO'yê Cemal Gokçe jî bilêv kir ku HDP'ê bi stratejiya xwe pesend kiriye ku "em dikarin bi hev re bijîn."
* Rojnamevan Ziya Ataman ku 34 roj in li Girtîgeha Wanê di greva birçîbûnê de ye, destnîşan kir ku bêdengî nayê qebûlkirin.
* Hevşaredarên HDP'ê yên bajaroka Akpazar a Dersimê Songul Dogan û Orhan Çelebî, diyar kirin ku wê ew û gel bi hev re şaredariyê bi rê ve bibin.
* 9 sal in kiryarên xebatkarê Azadiya Welat Metîn alataş (34) nehatine dîtin. Parêzerê malbata Alataş Şîar Rîşvanoglû, diyar kir ku lêpirsîneke çalak nehatiye kirin û cinayet daxilî nav cinayetên "kiryar nediyar" hatiye kirin. Dayik Hatûn Alataş jî, diyar kir ku kujerên kurê wê polîs û dewlet in.
* Zubeyde Çelîk, dayika Sînan Çelîk ku 99 roj in li Girtîgeha Tîpa F a Tekirdagê di greva birçîbûnê de ye, got: "Em tiştekî ji dewletê naxwazin. Bila tenê qanûnên xwe pêk bîne. Ma li benda mirina wî ne?"
* Endamên Partiya Çepgir a Fransayê ku roja hilbijartinê li navçeya Pîran û Hezroyê hilbijartin şopandin, diyar kirin ku tevî hemû zext û zoriyên polîsan jî gel çûye ser sindoqan û gotin: "Wexta em biçin welatê xwe em ê, behsa rejîma antî demokratîk a Erdogan bikin."
* Rêxistina HDP’ê li Navçeya Melezgîrtê ya Mûşê ku AKP bi 3 dengan bi ser ket û 432 deng jî nehatin hesibandin, îtîraz kiribû. Lijneya Hilbijartinê ya Bajar îtîraza HDP'ê red kir. Hevseroka Giştî ya HDP'ê Pervin Buldan, têkildarî geşedanan hat bajar.
* Necatî Pîrînçoglû hevşaredarê nû yê Şaredariya Peyasê, bal kişand ser dewrkirina mal û milkên şaredariyê û got: "Di 99'an de wexta me şaredarî bi dest xist maseyek jî tune bû. Em ê li avahiyan, li ser maseyan xizmetê nekin. Qurîşek jî be em ê li kuçe û kolanan tevî gelê xwe biryarê bidin û em ê li gor pêdiviyan xerc bikin."
* Hevşaredarên nû yên Şaredariya Êlihê Songul Korkmaz û Mehmet demîr, diyar kirin ku wexta ew mazbataya xwe bigirin ewilî wê deynên şaredariyê û nelirêtiyên hatine kirin bi raya giştî re parve bikin.
* Şêniyên Amedê encama hilbijartinê nirxandin û gotin: “Divê ku Amedê dersek bida qeyûman. Wê dersê jî di sindoqan de da. Ev bersivdayîn gellek li Amedê tê.”
* Mazlûm Teke ku li Girtîgeha Tîpa D a Amedê ji 1'ê Adarê ve di greva birçîbûnê de ye, got: "Pêvajoya herî tarî, pêvajoya herî nêzîk e. Pêngava berxwedanê ji niha ve tirs xistiye nava faşîzmê. Wê damî bêhempa be."
* Îtirazên HDP'ê yên li Mûş, Tetwan, Agirî, Bedlîs û bajarên din hatine kirin wê bên şopandin.
* Danişîna doza Gerînendeya Weşana Giştî ya Ozgur Gundemê ya bi KHK'ê hat girtin Eren Keskin û rojnameger Ertugrul Mavioglu, Omer Agin, Îhsan Çaralan, Celalettin Can, Fehmi Işik û Oncu Akgul wê li 14'emîn Dadgeha Cezayên Giran a Amedê bê dîtin. (09.30)
* Meclisa Ciwanên HDP'ê ya Stenbolê wê têkildarî binçavkirin û zextên li ser endamên xwe li avahiya HDP'ê ya Stenbolê civîna çapemeniyê pêk bînin. (14.00)
* Meclîsa Jinan a KESK'a Stenbolê wê têkildarî zextên li ser girtiyan û çalakgerên greva birçîbûnê li 3'emin Şaxa Egîtîm Sen'ê civîna çapemeniyê pêk bînin. (17.00)