Sînan Erkiliç ku li Girtîgeha Sîlîvrî ya Jimare 5'an di 1'ê Adarê de dest bi greva birçîbûnê kir, di 21'ê Adarê de hat berdan. Piştî hat berdan niha li mala xwe ya li Başakşehîrê çalakiya xwe didomîne. 

 

‘TIRKIYE VEGUHERIYE DOJEHÊ' 

 

Erkiliçê ku ji Bedlîsê ye diyar kir ku ew tim bi zext û zoriyan re rû bi rû mane û got: "25 sal in em li van dera ne. Lê belê em tu carî ji zext û zoriyên dewletê xelas nebûn. Niha jî bi sedemên sûkî mirov tên girtin. Êdî derve veguheriye zindanekê. Tirkiye hem di warê aborî hem jî di warê çandî de veguheriye dojehê." 

 

‘RUHÊ BERXWEDANÊ RUHÊ 14'Ê TÎRMEHÊ YE' 

 

Erkiliç, diyar kir ku berê jî ew hatiye girtin lê belê cara ewil e hatiye girtin. Erkiliç, bilêv kir ku li girtîgehan berî çalakiya greva birçîbûnê jiyaneke rûtîn hebû, lê belê piştî çalakiyê ruhê 14'ê Tîrmehê careke din li girtîgehan peyda bûye û got: "Bi berxwedanê re ruhekî pir cuda derket holê. Berxwedan bi xwe re coş û yekîtî anî. Ruhê berxwedanê ruhê 14'ê Tîrmehê ye û bila şik û gumana tu kesî tune be wê ev ruh bi ser bikeve. Divê gelê me vê berxwedanê mezintir bike." 

 

‘BI COŞ IN' 

 

Erkiliç, bi bîr xist ku beriya 1'ê Adarê 331 girtî di greva birçîbûnê de bûn û got: "Wexta me li hevalên xwe yên di greva birçîbûnê de dinerî, me xwe deyndar hîs dikir. Me jî dixwest em daxil bibin. Piştî 1'ê Adarê em jî ketin greva birçîbûnê û wê çaxê em hay ji ruhê hevalan çêbûn. Berxwedan baweriyê li mirovan peyda dike û ev bawerî mirov heta dawiyê dibe. Li hundur nêzîkatiya hevalan nêzîkatiyeke ku bi peyvan nayê gotin. Li hundur coşeke mezin heye." 

 

‘EV BERXWEDANEKE FEDAÎ YE' 

 

Erkiliç, destnîşan kir ku niha li girtîgehan bi hezaran kes di greva birçîbûnê de ne û got: "Ev berxwedaneke fedaî ye. Em kesên di berxwedanê de bibiryar in. Dixwazim ji gelê me re bêjim; li dor vê berxwedanê bibbin xelek û berxwedanê mezin bikin. Ev tecrîd di şexsê Abdullah ocalan de li ser hemû civakê tê pêkanşn. Divê em vê tecrîdê bişikînin. Heta tecrîd bi dawî nebe wê civak nikaribe bêhnê bsitîne. Ancax bi vî awayî em dikarin azad bibin." 

 

Erkiliç, anî ziman ku li gor hundur li derve di warê derûnî de çalakiya greva birçîbûnê zehmetir e û got: "Tu bikî nekî diya min, hevjîna min û zarokên min li ber dikevin. Lê ez bibiryar im ez ê heta dawiyê bidomînim." 

 

DAYIK GULBAHAR ERKILIÇ: EM Ê DEV JI RÊBERÊ XWE BERNEDIN 

 

Dayik Gulbahar Erkiliç jî got: "Kurê min jî wekî hevalên xwe ye. Tu ferqa wî û hevalên wî li cem min tune ye. Helbet tu dayik naxwaze, lê dema hevalên wî di grevê de bin û em rabin tiştekî wis abêjin ne rast e. Jixwe em bêjin jî wê dev jê bernede." 

 

Erkiliç, bi bîr xist ku Rêberê PKK'ê Abdullah Ocalan 20 sal in tê tecrîdkirin û got: "Wekî her gelî rêberê gelê kurd jî heye. Rêberê kurdan Abdullah Ocalan e. Abdullah Ocalan aştiyê dixwaze. Mirov ji bo wî dikevin greva birçîbûnê, nexwe divê dewlet vê yekê bibîne. Ev mirov bi tiştekî dizanin ku dikevin greva birçîbûnê û xwe dişewitînin. Bila nebêjin kurd dev ji rêberê xwe berdane. Em ê tu carî dev ji rêberê xwe bernedin." 

 

Dayik Erkiliç, bang li rayedarên dewletê kir û got: "Bila destê xwe deynin ser wijdanê xwe. Madem dibêje ez mafdar im û Tirkiyeyê bi rê ve dibim, nexwe divê li dor maseyê rûnê. Kî mafdar e wê derkeve holê. Ma tiştekî wan ê mafdar tune ye ku werin rûnên. Ji aştiyê direvin. Çima? Çimkî ê aştiyê dixwazin em in. Kî dixwaze leşker û polîs bimirin. Wexta dimirin em jî wekî dayika wan digirîn. Dayiktî ew e ku mirov êşa hev par ve bike. Divê kesên Tirkiyeyê bi rê ve dibin me fêm bikin. Ma kesên welat bi rê ve dibin ji zarokên xwe hez nakin? Ê ku ji zarokên xwe hez bike wê ji zarokên din jî hez bike. Nexwe ji zarokên xwe hez nakin." 

 

‘TECRÎDÊ ŞERMEZAR DIKIM, ÊDÎ BES E' 

 

Her wiha Erkiliç, bêdengiya çapemeniyê jî rexn ekir û got: "Wexta mesele kurd bin, xwe li bêdengiyê datînin. Ev wijdaneke çawa ye." 

 

Erkiliç got: "Ji ber rêberê kurdan dê tecrîdkirin grevên birçîbûnê tên kirin. Daxwaza zarokên me zelal e. Daxwaza wan daxwazeke mafdar e. Ev qas mirov xwe ji bo wî feda dikin. Loma hûn nikarin rêberê gelekî bigirin. Ez vê tecrîdê şermezar dikim. Êdî bes e." 

 

MA / Naci Kaya