MÊRSÎN – Farûk Aras ku li Girtîgeha Tîpa F a Kirikkaleyê ji 1'ê Adarê ve di greva birçîbûnê de ye, ragihand ku rewşa hevalên wî yên ji 26'ê Kanûna 2018'an ve di greva birçîbûnê de ne, di asteke pir krîtîk de ye û hevalên wî pir zihîf bûne, birîn di canê wan de derketiye û nikarin rakevin.
Çalakiya greva birçîbûnê ya Hevseroka Kongreya Civaka Demokratîk (KCD) û Parlementera HDP'ê ya Colemêrgê Leyla Guven û 7 hezar girtiyan ku li dijî tecrîdkirina Rêberê PKK'ê dabûn destpêkirin didome. Yek ji girtiyên di greva birçîbûnê de jî Farûk Arasê 29 salî ye. Aras, li Girtîgeha Tîpa F a Kirikkaleyê ji 1'ê Adarê ve di greva birçîbûnê de ye.
'44 GIRTÎ DI GREVA BIRÇÎBÛNÊ DE NE'
Aras, di sala 2012'an de ji ber fealiyetên xwe yên siyasî hatiye girtin û bi îdiaya "endamtiya rêxistinê" 120 sal ceza lê hatiye birîn. Aras, di 23'yê Adarê de bi telefonê li malbata xwe geriya û bal kişand ser rewşa girtiyên di grevê de û daxwaza wan. Aras, diyar kir ku li Girtîgeha Kirikkaleyê 44 girtî di greva birçîbûnê de ne û ji van girtiyan Sedat Alçîçek, Îsa Îpeklî, Emrah Ûbîç, Kerem Îmrek, Davût Onder û Îsmet Akin ji 26'ê Kanûna 2018'an ve di greva birçîbûnê de ne û 39 girtiyên din jî ji 1'ê Adarê ve di greva birçîbûnê de ne.
‘REWŞA WAN DI ASTEKE KRÎTÎK DE YE'
Aras, diyar kir ku rewşa 8 girtiyan di asteke pir krîtîk de ye û yek ji girtiyên rewşa wî pir krîtîk jî Sedat Alçîçek e. Aras got: "Tenduristiya wan di asteke pir krîtîk de ye. Ez û Sedat Alçîçek di heman qawîşê de ne. Rewşa wî nebaş e. Pir zihîf bûye. Nikare rakeve û birîn di canê wî de çêbûne. Tansiyona wî tim kêm dibe. Rewşa girtiyên ji 1'ê Adarê ve ketine grevê niha baş e. Lê belê ji koma ewil rewşa 6 hevalan qet nebaş e. Îdareya girtîgehê ava fêkiyan, çay, qahwe û vîtamîna B dide me girtiyên di greva birçîbûnê de."
‘JI DESTÊ KÊ ÇI TÊ DIVÊ BIKE'
Aras, destnîşan kir ku daxwaza wan daxwazeke mafdar û rewa ye û got: "Armanc diyar e. Bidawîbûna tecrîdkirina Rêberê me ye. Divê gelê kurd vê tecrîdê qebûl neke. Çimkî tecrîd sûx e û Rêberê me ji bo gelê kurd û me partiyan xeta sor e. Em ji bo vê ketine greva birçîbûnê. Kes nikare me ji armanca me dûr bixe. Em ê heta dawiyê bitêkoşin. Ji bo şehdat zêde çênebin, divê gelê kurd û hemû kesên xwe ji xwe re dibêjin em sosyalîst
û misilman in çi ji destê wan tê bikin. Niha tiştek neyê kirin wê bi derengî bikeve."
‘ÇI DIBE BILA BIBE EM Ê BIGIHÊN ARMANCA XWE'
Aras, diyar kir ku çi dibe bila bibe ew ji bo bigihên armanca xwe ew ji bo her tiştî amade ne û got: "Çi dibe bila bibe em ê bigihên armanca xwe. Em ê ji bo vê armancê heta dawiyê bitêkoşin. Hevaê Zulkuf û hevala Ayten mizgîniya serketinê dan me. Em fedaî ne, em fedaiyê gelên xwe ne û ji ti tiştî natirsin."
MA / Ergin Çaglar