Çalakiya greva birçîbûnê ya Hevseroka Kongreya Civaka Demokratîk (KCD) û Parlementera HDP'ê ya Colemêrgê Leyla Guven ku li dijî tecrîdkirina Rêberê PKK'ê Abdullah Ocalan da destpêkirin di roja 128'an de didome. Her wiha ji xeynî girtîgehan li avahiya HDP'a Amedê çalakiya greva birçîbûnê ya parlementerên HDP'ê Tayyîp Temel, Dersim Dag û Mûrat Sarisaç û endamên HDP'ê jî didome. Ji roja ku çalakiya greva birçîbûnê li avahiya HDP'ê dest pê kiriye gelek kes serdana çalakgeran dikin. Yek ji van kesan jî Azadê 10 salî ye. 

 

Azad, li semta Şehîtlikê dijî û ji bo serdana çalakgeran bike di dest wî de gulek û erbaneya wî çû burua hilbijartinê ya HDP'ê ya li Kolana Alî Emîrî û ji kesên li buroyê xwest serdana çalakgeran bike. 

 

Azad, tevî xebatkarên HDP'ê çû avahiya HDP'ê û gula di dest xwe da parlementer Dersim da û got, ew ji bo piştgiriyê hatiye. Azad, bi çalakgeran re sohbet kir û tecrîda hey, çalakiyên greva birçîbûnê yên li dijî tecrîdê û bi giştî pêvajoya siyasî nirxand. 

 

Azad ku got "wexta pêlîstok hebin tu zarok li van tiştan nafikire, wexta zext û zorî tune bin kes van tiştan lêkolîn nake" got: "Leyla Guven 127 roj in di greva birçîbûnê de ye. Tecrîd tiştekî pir pîs e û hûn ji bo vê di greva birçîbûnê de ne. Tecrîd, cihêkarî ye. Hûn ji bo min, ji bo gelê kurd di grevê de ne. Tenê ne Abdullah Ocalan, kesên ji ber fikrên xwe yên siyasî hatine girtin hemû tên tecrîdkirin. Tecrîdkirina Abdullah Ocalan tiştekî pir xirab e." 

 

‘EM Ê BI BERXWEDANÊ BI SER BIKEVIN' 

 

Azad, bilêv kir ku ew ji bi piştgiriyê hatiye û got: "Wexta mirov min bibînin, wê fêm bikin. Sûc a me kurda ye. Ji bo çi mafên xwe naparêzin? Çima nadin dû doza xwe. Lê binerin dirûşmeya wan ev bû 'bi tirkî biaxive, pir biaxive.' Eger kurd, ev qas eziyet li tirkan bikiranan piştî demekê me yê ew berdana. Lê ew nahêlin em azad bijîn. Lê em ê bi berxwedanê bi ser bikevin." 

 

‘EV DER WELATÊ ME YE' 

 

Azad, bi bîr xist ku Serokomar Erdogan li qadên mîtîngê ji bo kurdan dibêje "ji vî welatî biçin". Azad, bilêv kir ku ev gotin ew nerihet kiriye û got: "Me diqewirîne. Ev der welatê me ye. Ew xwîna li ser alayê xwîna me ye jî. Çimkî me jî wekî tirk, çerkez, elewî û ermeniyan di Şerê Cîhanê yê Yekemîn de şer kir. Dixwazin bi fondotenê ser wê bigirin, lê wê nikaribin bigirin." 

 

Azad, destnîşan kir ku dewlet dixwaze kurdan bike tirk û got: "Kur dneqediyane. Em ji bera berê de hene. Hadê em bêjin em hemû mirin, lê wê pitikek bimîne. Wexta ew mezin bibe wê doza mafên xwe bike. Wê bipirse 'ji bo çi we diya min kuşt?' Tu meseleyeke me bi tirkan re tune ye, meseleya me bi faşîzmê re ye." 

 

MA / Ozgur Paksoy- Mehmet Şah Oruç