ENQERE – Derket holê ku Serokomar Recep Tayyîp Erdogan roja ku DMME’yê der barê Selahattîn Demîrtaş de biryara berdanê da li Enqereyê bi Serdozgerê Komarê yê Enqereyê Yuksel Kocaman re hevdîtin pêk aniye.
Derket holê ku Serokê Giştî yê AKP’ê û Serokomar Recep Tayyîp Erdogan roja sêşemê ku Dadgeha Mafê Mirovan a Ewrûpayê (DMME) der barê Hevserokê Giştî yê HDP’ê yê berê Selahattîn Demîrtaş de biryara berdanê da li Enqereyê bi Serdozgerê Komarê yê Enqereyê Yuksel Kocaman re hevdîtin pêk aniye. Li gorî nûçeya nûçegihanê rojnameya Cumhuriyetê Alîcan Uludag; daxwaza hevdîtinê ji Erdogan hatiye kirin û der barê naveroka hevdîtinê de daxuyanî nehatiye dayîn. Li ser vê yekê pirsa gelo Erdogan biryara DMME’yê ya der barê Demîrtaş de bi serdozger Yuksel re axiviye tîne bîra mirov.
Doza Demîrtaş ku li Dadgeha Enqereyê tê dîtin Serdozger Yuksel jê berpirsyar e.