AMED – Parlamentera HDP'ê ya Amedê Dersim Dag, êrîşa çekdarî ya li dijî avahiya HDP'ê ya Bismilê şermezar kir û wiha got: "10 gule berdan avahiya partiya me. Ev gule berdane aştî û xweh û biratiya gelan."
Rêxistina Partiya Demokratîk a Gelan (HDP) a Bismila Amedê, têkildarî êrîşa çekdarî ya li dijî avahiya HDP'ê ku di şeva 12'ê Mijdarê de pêk hat, li ber avahiya HDP'ê ya Bismilê daxuyanî dan çapemeniyê. Bi sedan endam û rêveberên HDP'ê tev li daxuyaniyê bûn. Parlamenterên HDP'ê yên Amedê Dersîm Dag û Remziye Tosun, rêveberên Partiya Hêrêmên Demokratîk (DBP) nûnerên Komeleya Astengdarên Bedenê ya Bismilê û gelek kesên din amade bûn.
Parlamenterên HDP'ê ku ji bo tev li daxuyaniyê bibin çûn Bismilê, li nêzî Bismilê ji aliyê polîsên ku barîkat li ser rê danîbûn ve hatin rawestandin. Parlamentera Amedê Remziye Tosun diyar kir ku ew wekîlên gel in û xwest rêya xwe berdewam bikin. Polîsan jî ji Remziye Tosun re got "Dibe ku we terorîst li erebeyê suyar kiribin". Pişti nêzî 15 deqîqeyan hatin rawestandin, rêya wekîlan vekirin. Beriya ku Rêxistina HDP'ê daxuyaniyê bide, polîsan bi maşîneyên zirxî û TOMA'yan dora avahiyê dorpêç kirin. Li ser navê girseyê Hevserokê HDP'ê yê Bismilê Refai Baran daxuyanî da. Baran, anî ziman ku heta niha der barê êrîşê de tu agahî bi wan re nahitye parvekirin û bertek nîşanî helwesta polîsan da. Baran, destnîşan kir ku ew der barê êrîşê de dozdar in û wiha got: "Şêniyen Bismilê ji sedî 90 HDP'î ye. Ev partî li ser îstîsmaran nehatiye avakirin. Ev partî mîrateya şehîdên demokrasiyê ye. Emanetê Musa Anter, Vedat Aydın û Mehmet Sincar e. Em li vî emanetî xwedî derdikevin. Gel bi van êrîşan gavan paşve navêje. Em ji canê xwe natirsin. Em li emanetê xwe xwedî derdikevin.
GULE BERDANE AŞTIYÊ
Parlamentera HDP'ê ya Amedê Dersim Dag jî êrîşa li dijî avahiyê şermezar kir û wiha got: "Êv êrîşek faşizan e. 10 gule berdane avahiya partiya me. Ev gule berdane aştiyê. Berdane xweh û biratiya gelan." Dag bal kişand ser polîsên avahî dorpêç kirine û wiha berdewam kir: "Qaşo ji bo ewlehiya me li vir sekinî ne. Ger ku hûn ji bo ewlehiya me li vir in, ewil biçin van êrîşan asteng bikin. Kesên ku çekan berdidin me bigirin. Em li dijî van êrîşan stu xwar nakin. Em têkildarî van êrîşkaran de belgeyên fermi dixwazin. Xwediyê Bismilê gelê Bismilê ye. Bila her kes wisa zanibe."