Meclîsên Jinên Sosyalîst (SKM), têkildarî 25'ê Mijdarê Roja Têkoşîna Li Hemberî Şideta Jinê ya Navnetewî bi dirûşmeya "Li hemberî şidet û krîzê em serî radikin, xwe diparêzin" xebat dan destpêkirin. Xebat di 1'ê Mijdarê de hatin destpêkirin û xebat diyarî bi milyonan jinên bi şidetê re rû bi rû mane hat kirin. 

 

SKM, wê di vê çarçoveyê de bi mottoya "25Mijdar25Jin" xebatên xwe bi rê ve bibe û wê bi çalakiyên wekî stîcker, setncil, anket, belavok û bultenan rasterast pêwendiyê bi jinan re deyne. SKM, bi evan xebatan dixwaze di warê şidetê de hayjêhebûnê li jinan peyda bike û di warê mafên jinan de jinan serwext bike. 

 

Berdevka SKM'ê ya Stenbolê Ezgî Bahçecî, der barê xebatên tên kirin de agahî dan. 

 

Bahçecî, anî ziman ku rêxistinên jinan ji bo 25'ê Mijdarê her sal xebatan dikin û got: "Me jî îsal hem der barê şideta li hemberî jinê hem jî krîza aborî ya bandorê li jinan dike xebat dan destpêkirin. Krîz hem di warê aborî de hem jî di warê derûnî û şidetê de tesîrê li jinê dike. Ewilî jin ji kar tên derxistin. Herî zêde jin bê sîgorta tên xebitanin û debarkirina malê li wan tê barkirin. Me xwest em vê û 25'ê Mijdarê bikin yek. Em diyar dikirin ku em hem li hemberî şidetê hem li hemberî krîza aborî û hem jî li hemberî tesîrên wê yên xwe didin der serî radikin û xweparastina xwe xurt dikin." 

 

'EM ANKETAN ÇÊBIKIN' 

 

Bahçecî, diyar kir ku wan bi navê "25 Mijdar25Jin" xebateke sembolîk çêkiriye û got: "Em ê di vê çarçoveyê de der barê 25 jinên hatine qetilkirin û xweparastine bîranînan û çalakiyên serdêrî çêbikin. Li Tirkiye û Kurdistanê 25 jin û li Stenbolê jî 15 jinên hatine kuştin, em ê biçin cihê lê hatine kuştin û qurnefîlan deynên cihê wan û daxuyaniyê bidin. Em dixwazin balê bikişînin şideta mêr a li hemberî jinê. Eger em karibin xwe bigihînin wan em ê serdana malbatan bikin. Em ê kartan ji jinên ji ber xweparastine û hatine girtin bişînin. Ji xeynî vê xebata me ya anketî ya der barê krîza aborî û şidetê heye." 

 

Bahçecî, anî ziman ku di dema pêvajoya Rewşa Awarte de ew bûne şahidên polîtîkayên dewletê yên bi awayekî sîstematîk li hemberî jinê hatine biakranîn. Bahçecî got: "Polîtîkayeke êrîşkar û mafên jinan xesp dike tim heye. Li hemû qadên jiyanê jin bi êrîşan re rû bi rû dimînin. Ev yek jinan tune dike. Em vê yekê bi cezakirinên tê dayîn dibînin. Bi qanûn û sererastkirinan ev êrîş tê destekirin û hewl didin bikin awayekî tevgerî yê civakê. Li hemberî pratîka me ya xweparastinê dibêjin em ê we ceza bikin. Peyama divê hûn jina maqûl bin didin. Li hemberî vê em jin mecbûr in bi rêxistinî têkoşînê xurt bikin. Pergaleke mêrî heye û bi kapîtalîzmê ev yek li tevahiya civakê tê belavkirin." 

 

'DI 25'Ê MIJDARÊ DE EM LI QADAN BIN' 

 

Bahçecî, bang li hemû jinan kir ku di 252ê Mijdarê de li Taksîmê bin, da jin hêza xwe li hevdu zêde bikin û têkoşîna jinê mezin bikin. 

 

MA / Necla Demîr