Piştî qeyûm tayînî Şaredariya Wêranşar a Rihayê hat kirin, 135 karker ji kar hatibûn derxistin. Karker ji bo vegerin ser karê xwe doz vekiribûn, lê belê 2 sal in dozên wan bi dawî nebûne. 

 

Karker Mihdî Vûral, diyar kir ku pêşî 34 karker ji kar hatin derxistin. Vûral anî ziman ku berî qeyûm bê tayînkirin hemû fealiyetên şaredariyê tabiî destûra qeymeqam hatibûn kirin û wê demê emniyetê bi hinceta "lêpirsîna ewlehiyê" lîsteya karkeran girtiye û piştî qeyûm hat tayînkirin ev yek demildest pêk hat. Vûral, destnîşan kir ku bi hinceta "alîkariya rêxistinê kiriye" û "xizmên wî endamên rêxistinê ne" ji kar hatiye derxistin. Vûral anî ziman ku bi vî awayî der barê wî de tu doz tunebûne û got: "Ger min li ser navê rêxistinê sûcek kiribe, nexwe çima dozê li min nakin." 

 

Vûral, diyar kir ku ew 10 salan di şaredariyê de xebitiye û piştî ji kar hatiye derxistin mafên wan û tazmînata wan nehatiye dayîn. Vûral, destnîşan kir ku ji bo mafên xwe bi dest bixin wî li Dadgeha Kar a Dîlokê doz vekiriye, lê belê hîn cî doz bi dawî nebûye. Vûral got: "Ne diyar e dê doz kengî bi dawî bibin. Min kredî ji bankeyê kişand, lê nikarim deynê xwe bidim. Ji ber bankayê îcra hatiye destpêkirin. Li benda bi dawîbûna dozê me." 

 

'VÎN HATIYE XESPKIRIN' 

 

Vûral, anî ziman ku qeyûm tenê ne wî 135 karkerên din jî mexdûr kiriye û got: "Qeyûm xespkirina vînê ye. Bi tayînkirina qeyûm vîna bi deh hezaran mirovî hat xespkirin. Qeyûm tenê ne mafên me yên aborî, di heman demê de vîna me jî xesp kir." Vûral, diyar kir ku ew ê tu carî vê yekê qebûl nekin û got: "Li pêşiya me hilbijartina herêmî heye. Ev ji bo me ne hilbijartineke normal e, em ê xwedî li vîna xwe derkevin. Hilbijartina herêmî ji bo me hilbijartina hesabpirsînê ye. Loma divê herkes xwe baş amade bike. Em karker em ê qeyûm ji şaredariyê bavêjin." 

 

‘EMNIYETÊ LÎSTE AMADE KIRIN' 

 

Serdar Karatepe yê ku zabiteyê şaredariyê bû û bi tayînkirina qeyûm ji kar hat derxistin got: "Bi fermana walîtiyê emniyetê lîsteya karkerên şaredariyê amade kir. Di lîsteya emniyetê de navê 135 karkeran hebû û hemû ji kar hatin derxistin." Karatepe, da zanîn ku bi hinceta "têkiliyên wî û rêxistinê hatin tespîtkirin" û "hat tespîtkirin ku ji malbata wan kesek di nav rêxistinê de ye" ji kar hatiye derxistin. Karatepe, destnîşan kir ku mafê karkerên ku 10-20 salan di şaredariyê de xebitîn nedan wan û got: "Me doz vekir, lê hîn jî bi dawî nebûye." 

 

'QEYÛM RUHÊ BAJÊR KUŞT' 

 

Karatape, destnîşan kir ku hilbijartina herêmî ji bo wan hilbijartina hesabpirsînê ye û got: "Qeyûm tenê em mexdûr nekirin. Hemû kesên vî bajarî mexdûr kir. Tu tişt li bajêr zêde nekiriye. Qeyûm xizmeta li vî bajarî bi şûnve bir. Her wiha weyûm ruhê vî bajarî kuşt. Loma hilbijartina herêmî pir girîng e. Dibêjin qeyûm gel bi hev re ne, tiştekî wisa tune ye, derew e. Wexta qeyûm diçe cem gel 15-20 ewlekar li dorê ne. Ger ev tune bin nikare gavekê jî bavêje. Em ê qeyûmê ku vîna me xesp kiriye di hilbijartinê de bişînin." 

 

MA / Erdogan Alayumat