ENQERE – Serokê rûmetê yê HDP'ê Ertugrul Kurkçu, helwesta Tayyip Erdogan a 'Em dê dîsa qeyûm tayîn bikin' şermear kir û diyar kir ku ev meseleya rûmetê ye û wiha got: "Ev ne meseleya îktîdarê ye. Ev meseleya rûmetê ye. Ev yek dê dawî li Erdogan bîne. Ji ber ku li hemû kesan şerê rûmetê ferz dike."
Serokê Giştî yê AKP'ê û Serokomar Tayyip Erdogan, ji bo şaredariyên DBP'ê ku qeyûm tayîn kiriye gotibû "Ger şaredariyên me qeyûm tayîn kiriye di hilbijartina 2019'an de HDP bistîne em dê dîsa qeyûm tayîn bikin". Bertek û nerazîbûnên li dijî helwesta Erdogan her ku diçe zêde dibe. Piştî gotina Erdogan li 9 bajarên ku navenda wê Amed bû operasyon hatibû lidarxistin. Di operasyonê de ji 141 siyasetmedar û rojnamegerên hatin binçavkirin di navde Rojnameger Kibriye Evren û Hevserokê Rêxistina Partiya Demokratîk a Gelan (HDP) yê Amedê Mehmet Şerif Çamçi ji heye 25 kes hatin girtin. Li dijî van politîkayên hikûmetê û operasyonên binçavkirinê Serokê rûmetê yê HDP'ê û parlamenterê HDP'ê yê Îzmirê yê berê Ertugrul Kurkçu, helwesta Erdogan nirxand.
Kurkçu, diyar kir ku Erdogan ji bo pergala xwe ya Serokdewletiyê baş bide rûniştandin armanc dike ku di hilbijartina rêveberiyên herêmî de hêza xwe zêdetir bike û ev hewldana wî ya dawî ye. Kurkçu, da zanîn ku ewil di hilbijartina referandumê ya Qanûna Bingehîn de hîle kir, piştre di hilbijartina 24'ê Hezîranê de û niha jî dixwaze di hilbijartina Rêveberiyên Herêmî de bi hîleyan bistîne û li gori wê planan dike. Ger ku li Kurdistanê şaredariyên ku qeyûm tayîn kiriye winda bike û dîsa HDP bi ser bikeve, ev ji bo wan têkçûna rejîmê ye. Niha rejim wekî mirovê ku li ser pêçiyek lingê xwe raweste ye. Bi vî halî nikare demdirêj bimeşe. Ji bo bimeşe divê du piyên xwe dîne erdê û ji ber vê yekê hilbijartinên rêveberiyên herêmî ji bo wan girîng e."
‘HDP DIYARKER E'
Kurkçu, da zanîn ku îktîdarê hem di hilbijartina Referanduma Qanûna Bingehîn de û hem jî di hilbijartina 24'ê Hezîranê de aşkere hile kir û wiha got: “Dengê îtîfaqa xwe ya ji sedî 49 wekî ji sedî 51 nişan da. Lê di hilbijartinên rêveberiyên herêimî de ev îmkana wan tune ye. Ji ber vê yekê îhtimala ku şaredariyên Bajarên mezin ji destê îtifaqa AKP- MHP'ê derkeve pir zêde ye. Di vê hilbijartina rêveberiya herêmi de rola HDP'ê diyarker e. Li Enqere, Stenbol, Edene, Mêrsîn, Aydin, Manisa giraniya HDP'ê li ku be ew dê bi ser bikeve. Em ji niha de îdîda dikin ku şaredariyên ku qeyûm tayîn kiriye, HDP dê dîsa paşve bistîne. Ji bilî meseleya HDP’ê jî gelê kurd dê her dem vîna xwe diyar bike ku çawa dixwaze xwe bi rêve bibe. Gelê kurd kengî sindoq danîn pêş diyar kir ku çawa dixwaze xwe bi rêve bibe. Helwesta gelê kurd diyar e. Di hilbijartina giştî de deng bi rêbaza manipulasyonan hatin dizîn. Lê di hilbijartina rêveberiyên herêmî de dikarin vê yekê bikin. Ji ber ku Cizîr her dem Cizîr e. Sûr Sûr û Amed Amed e. Nayê guhertin. Gel çi biryarê bide wisa ye. Li Enqere û Stenbolê jî rêjeya îtîfaqa Cumhur a faşist kêmî ji sedî 50 ye. Li van bajaran jî her ku diçe dengê AKP'ê û Erdogan kêm dibe.
'DIXWAZIN NAMZETAN REŞ BIKIN'
Kurkçu, helwesta Erdogan a tayînkirina qeyûman jî şermezar kir û wiha berdewam kir: "Ji niha de dixwaze bi van fefan û daxuyaniyên li dijî demokrasî û qanûna bingehîn namzetên HDP'ê reş bike. Operasyona dawî nîşaneya vê yekê ye. Ji niha de li pey lîstikan e ku HDP nikaribe namzetan hilbijêre. Wan davêje girtîgehê û dixwaze vê yekê jêre bike rûreşî û bi vî şiklî wan reş bike. Ji bo hilbijartinê dê nêzi 400'ê hezar mirov bên hilbijartin. Di nava 6 milyon tabana HDP’ê de dê 400 hezar kes bên hilbijartin. Ev rêjeyek gelek zêde ye. Dixwazin bi vî rengî rê li pêş HDP'ê bigirin ku nikaribe namzetan derxin. Operasyona li Amedê pêk hat, şerê sergirtî ye. Dixwazin krasê hiqûqê lê bikin. Em di şertên asayî de jî nikarin têkevin hilbijartinek asayî. Di şertên asayî de şertên awarte derdikevin pêş me. Dixwazin HDP'ê kriminalize bikin û nehêlin ku CHP nêzî wê bibe.
GEL HDP XIST MECLİSÊ
Kurkçu, da zanîn ku Erdogan dike qêrîn û dibêje ‘We ev xistin meclîsê'. Raste gel HDP xist meclîsê. Gel dizane ku beyî HDP’ê tu formum ne çareseri ne. Erdogan armanc dike ku hilbijartinê bi riya şer pêş bixe. Piştî meseleya Keşeyê DYA Brunson niha dixwaze şer pêş bixe. Tirkiye dixwaze DYA ji bo operasyona rojhilata Firatê destûr bide. Tirkiye dixwaze beriya hilbijartinê dîsa konsepta şer têxe meriyetê. Erdogan bi rêbaza alozî, tundi u nijadperestiyê dixwaze heza muhalefetê bişkîne. Bahçelî roportaj da Ertuğrul Ozkok û aşkere dibêje ‘Divê HDP 101 şaredariyan nestîne' Ger ku li Cizîrê MHP û li Amedê AKP şaredariyan qezenç bike wê demê ev rêbaz li dijî hilbijartinê ye. Gelê kurd heta niha her dem li ser sindoqê bersîv daye û dê niha jî teqez bersîvê li ser sindoqê bide îktîdarê.
MA / Berîvan Altan