ENQERE - Pisporê Rojhilata Navîn Mustafa Pekoz, diyar kir ku DYA bi tu awayî nikare bi Tirkiyeyê re li ser Minbicê bazarê bike. Pekoz, anî ziman ku ger Erdogan gefê xwe yê li ser Minbicê bidomîne, dê şer derbasî Elbabê bibe.
Pisporê Rojhilata Navîn Mustafa Pekoz, der barê polîtîkayên Tirkiye yên li dijî Idlib, Minbiç û berdana Rahîbê DYA'yê Andrew Brunson de nirxandin kirin. Pekoz, diyar kir ku di rewşa Minbicê de li gorî berê tu guhertin tune û wiha got: "Minbiç rewşa xwe ya berê diparêze. DYA'ê di daxuyaniyên berê de diyar kir ku hêzên QSD'ê û YPG'ê ji Minbicê vekişiya ne. Li gorî polîtîkayên ku QSD'ê diyar kiribûn li Minbicê pergala reveberiyê hatiye avakirin. DYA çend çaran ev yek teyit kir. Mekanîzmaya kontrola Minbiçê di destê QSD'ê de ye. Li ser xetên sînor DYA û Rûsya heye. Di rewşa heyî de tu guhertin tune ye.
'BAZAR BI TU AWAYÎ BANDORÊ LI MINBICÊ NAKE'
Pekoz, der barê daxuyaniyên Tirkiye yên ku piştî berdana Rahîbê DYA Andrew Brunson de li ser Rojhilatê Firatê dike wiha got: "Piştî vê daxuyaniyê cemawerî pirsa 'Piştî Brunson niha Minbic heye? dipirse. Lê Trump di daxuyaniya xwe de diyar kir ku bi tu awayî bazara wan bi Tirkiyeyê re tune ye. Dibe ku bazar li ser Fethullah Gulen û Midûrê Banga Gel be. Tirkiye di vê bazarê de nikare derbasî Rojhilata Firatê û yê sûriyeyê bibe. Lê Tirkiye dikare vê rewşa Brunson bikar bine û cihê xwe fireh bike. Trump zelal aşkere kir ku ew dilê xwe nakin mijara bazarê. Got Tirkiye rahîbê wan dîl girtiye. Brunson 10 salan jî girtî bimîne, DYA wî li ser Minbicê nake mijara bazarê."
MANÎPULASYONA KU BALÊ BIKIŞİNE SER MINBIC Û ROJHILATA FIRATÊ YE
Pekoz, da zanîn ku wekî Tirkiye got û plan kir hesabê wê yê li Idlibê di rêde naçin û wiha axivî: "Tirkiye di mijara Idlibê de ketiye tengasaziyê. Li qadê geşedan dijberî daxuyaniyên Tirkiye ne. Ji bo bala gel a li ser Idlibe belav bike û ser van geşedanan bigire dibêjin 'Em dê têkevin Minbicê. Em dê Rojhilatê Firatê belav bikin' Manîpulasyonê çê dikin. Ger ku Tirkiye di Minbiçê de israr bike dê Bab bibe qada şer. Wisa difikire ku DYA û Firansê bitirsîne. Li Minbicê bingeha ku li Elbabê krîzê ava bike heye. Ger ku Tirkiye gavek wisa bavêje dê çi bibe? Wê demê ne Minbic, dê Elbab bibe qada şer. Wisa bidominê dê serdestiya xwe ya li Elbabê jî winda bike. Geşedanên li qadê û daxuyaniyên Tirkiye li dijî hevin. "
'RÛSYA ALOZIYÊ PÊŞ DIXE'
Pekoz, bal kişand ser helwesta Rûsya û wiha berdewam kir: "Wekî ku Rûsya piştgiriyê dide Tirkiye hewayekê ava dike. Bi vî rengî peyamê dide DYA, Firansa û Kurdan. Rusya dibêje 'Binerin kurd dê dewleta serbixwe ava bike. Rojhilata Sûriye bêtir talûke ye' Tema em li van têgehan dinerin, polîtîkayên Tirkiye yên li ser Sûriye ne. Rûsya dixwaze bi vê yekê çi bike? Rûsya dixwaze nakokiya di navbera Tirkiye û DYA, Tirkiye û Firansa û Tirkiye û NATO de kûr bike. Rûsya dixwaze aloziyê bêtir kûr bike û tev liheviyê bike. Rusya lawaziyên Tirkiye dibîne û bi ser Tirkiye de diçe. Rûsya jî dizane ev yek ne pêkan e. Baş dizane ku heta pirsgirêka kurd çareser nebe pirsgirêka Sûriye jî çareser nabe. Ez bawer nakim ku Rûsya kurdan jî bîne hemberî xwe. Heta ku Rusya bi kurdan re peymanek dîplomatîk pêk nîne, li Sûriye aramî pêş nakeve. Ev yek ji bo Esad jî derbas dibe. Mijara esasî dixwaze Tirkiye bikar bîne."
LI SÛRIYEYA BAKUR RÊVEBERIYA XWESER NEBE NABE
Pekoz, heri dawî anî ziman ku ji niha û şûnde li herêmê dê rêveberiyek Navendî Amed bê avakirin û wiha bi dawî kir: "Êdî li herêmê rêveberiya xweser nebe nabe. Li gorî vê yekê li Bakurê Sûriyeyê pergala federatif û xweser mecbûrî ye. Di vê mijarê de di navbera DYA û Rûsya de niqaş tune. Îngîlîstan, Fransa, Almanya, Rusya û DYA li ser vê yekê li hev kirine. Êdî gav paşve nayên avêtin. Statuya Rojava hatiye diyarkirin. Ji niha û şûnde tenê tescîlkirina Neteweyên Yekbûyî ya Qanûna Bingehîn maye.
MA / Selman Guzelyuz