ENQERE – Serokê YARSAV'ê yê berê Mustafa Karadag diyar kir ku Rahîbê DYA Brunson li ser îfadeya şahidê nepen hat girtin û dîsa ji ber şahid îfadeya xwe guhert hat berdan û wiha got: "Bi îfadeya şahidekî nepen hat girtin û bi îfadeya heman şahidê hat berdan. Lê ev li Tirkiye bûye garabet. Şahidê nepen duh daraza cemaetê bikar dianî, îro hikûmet bikar tîne."
Papazê Amerîkî Andrew Craîg Brunson di 12'ê Cotmehê de derket pêşberî dadger û hat berdan. Piştî hat berdan çû DYA'yê. Danişîna çaremîn a Brunson li 2’yemîn Dadgeha Cezayê Giran a Îzmîrê hat dîtin. Buronson bi hînceta li ser navê “FETO û PKK” sûc kiriye heta 35 sal cezayê girtîgehê jê re tê xwestin tê darizandin. Di danişînê de kesên bi navê Buşra, Levent Kalkan û Serhat ku li ser Brunson îfade dabûn, îfadeyên xwe paşve kişandin. Piştî şahidan îfadeya xwe paşve kişandin, Brûnson hat berdan. Rahibê DYA'yî Andrew Brunson ku 20 salan li Tirkiye jiya, li ser îdîayan hatibû girtin û di 25'ê Tîrmehê de rastî cezayê hepsa malê hatibû. Dadgehê 3 sal û 45 roj cezayê girtîgehê dabû.
Têkildarî biryara darazê ya der barê Brunson û siyasetmedarên li Tirkiye girtî ne, Serokê Sendikaya Yargiçan (YARSAV) yê berê Mustafa Karadag nirxandin kir.
DIVÊ DARIZANDINA SERBEST ESAS BÊ GIRTIN
Karadag, anî ziman ku kesên der barê wan de doz hat vekirin divê darizandina serbest esas bê girtin û wiha got: “Di demên dawî de li Tirkiye her tiştî bi hiqûqê bi teşe dikin. Îktîdar her dem dibêje daraz serbixwe ye. Ji xwe divê daraz serbixwe be. Bi vî rengî dixwaze daraza ku niha ne serbixwe ye wekî serbixwe nîşan bide. Supekulasyonên der barê darazê yên ji aliyê hikûmetê ve tên kirin ne rast in. Li Tirkiye hemû hêzên muxalif bi destê darazê tên cezakirin. Dema ji bo kesekî dibêjin bigirin, çend roj şûnde ew kes tê girtin. Dema ji bo kesekî dibêjin ''Divê bê berdan' çend roj şûnde tê berdan."
DENÎZ YUCEL PIŞTÎ HEVDÎTINA BI MERKEL RE HAT BERDAN
Karadag bal kişand ser berdana rojnamegerê Alman Deniz Yucel û wiha axivî: "Berdana wî tiştekî erênî ye. Diviya bû bihata berdan. "Lê Deniz Yucel ne bi biryara darazê hat berdan. Wê demê piştî bi Merkel re hevdîtin hat kirin û Wezîrê Karên Derve yê Alman daxuyanî da û şûnde Yucel hat berdan. Di bûyera Brunson de jî heman tişt heye. Piştî vê rewşê êdî tu kes li Tirkiye baweriya xwe bi darazê nîne. Brunson bi îfadeya şahidê nepen hat girtin û bi îfadya heman şahidî hat berdan.
DUH CEMAET ÎRO HIKÛMET
Karadag. bal kişand ser daraza Tirkiye ya Cemaet û Hikûmetê û wiha bi dawî kir: "Duh cemaetê daraz kontrol dikir. Îro hikûmetê darazê kontrol dike. Duh cemaetê şahidê nepen bikar dianî. Îro hikûmet şahidê nepen bikar tîne. Li Tirkiye daraz êdî dibe partiya siyasî. Li Tirkiye hiquq êdî dibe partî û ji cewherê xwe dûr dikeve. Kes nikare bêje li Tirkiye daraz serbixwe ye."
MA / Berivan Altan