AMED - Endam, rêveber û parlamenterên HDP'ê yên heremê li ber avahiya HDP'ê ya Amedê daxuyanî dan û operasyona li dijî siyasetmedar û rojnamegerên kurd şermezar kirin. Rêveber û parlamenteran, kesên di komkujiya 10'ê Cotmehê de li GAR'a Enqereyê jiyana xwe ji dest dabûn jî bibîr anîn. Parlamentera HDP'ê ya Amedê Saliha Aydeniz, diyar kir ku operasyon encama tecrîda li ser Rêberê PKK'ê Abdullah Ocalan e û wiha got: "Em li dijî operasyonên komkujiya siyasî ya faşîst çong natewînin." 

 

Bi fermana Serdozgeriya Komarê ya Amedê, duh li 9 bajarên ku navenda wê Amed bû operasyona siyasî pêk hat. Di operasyonê de rojnameger û siyasetmedarên kurd jî di nav de zêdeyî 100 kesan hatin binçavkirin. Polîsan li 9 bajaran bi ser 183 malan de girt û zêdeyî 100 kesan binçav kirin. Kesên hatin binçavkirin li Şaxa TEM'ê ya Amedê tên rawestandin. Hevparên partiyên siyasî û rêxistinên demokratîk ên Amedê li dijî operasyona binçavkirina siyasetmedar û rojnamegerên kurd û komkujiya 10'ê Cotmehê li ber avahiya HDP'ê ya Amedê daxuyanî dan çapemeniyê. Di çalakiyê de parlamenterên HDP'ê yên herêmê, Hevserokê Kongreya Civaka Demokratîk (KCD) Berdan Ozturk, Endamên Meclîsa HDP'ê, endam û rêveberên DBP û DBP'ê yên Amedê, nûnerên rêxistinên demokratîk ên bi KHK'ê hatin girtin amade bûn. Di çalakiyê de parlamentera HDP'ê ya Amedê Saliha Aydeniz axivî û operasyonên li dijî siyasetmedar û rojnamegeran şermezar kir. Aydenîz, kesên di komkujiya GAR'a Enqereyê de jiyana xwe ji dest dan jî bibîr anîn. 

 

OPERASYON ENCAMA POLÎTÎKAYA TECRÎDÊ YE

 

Parlamenter Saliha Aydenîz, anî ziman ku ev operasyona li dijî siyasetmedar û rojnamegeran pêk hatiye di salvegera 9'ê Cotmehê roja ku Rêberê PKK'ê Abdullah Ocalan ji Sûriye hatiye derxistin de pêk hatiye û wiha got: "Operasyon berdewama komploya 9'ê Cotmehê ye. Encama tecrida li ser Birêz Ocalan e. Dixwazin civakê li dijî tecrîdê û komployê bêdeng bikin. Ji 2015'an heta niha komkujî pêk tên. Operasyonên qirkirina siyasî pêk tên.Ev operasyon û kirkirina siyasî û civakî encama polîtîkayên tecrîdê ne. 

 

KESÊN LI GAR'Ê HATIN KUŞTIN BIBÎR ANÎN

 

Aydenîz 103 kesên di 10'ê Cotmehê de li GAR'a Enqereyê hatin kuştin jî bibîr anî û wiha got: “Ev êrîş li dijî tekoşîna yekîtî û aştiya gelê Tirkiye pêk hatiye. Ev rojek reşe tev li dîrokê bûye. Hêj bi sedan hevalên me birîndar in. Em hemû li vir birîndar bûn. Lê em têk neçûn. Em netirsiyan û perçe  nebûn. Em natirsin u têk naçin. Em bêtir mezin bûn û me bêtir xwe bi rêxistin kir. Em dê bêtir mezin û bi hêz bibin. Her welatiyekî vî welatî heq dike ku di nava şatî, aramî û wekheviyê de bijî. Emê têkoşîna xwe ya aştî û azadiyê mezin bikin û em dê mafê xwe yê rewa bi dest bixin. 

 

EM LI DIJÎ OPERASYONÊN KOMKUJIYÊ ÇONG DANÎNIN

 

Aydenîz, bal kişand ser komkujiya 5'ê hezîrana 2015’an a li Amedê û komkujiya 10'ê Cotmehê ya li GAR'a Enqereyê û wiha berdewam kir: "Xwestin bi komkujiyan me ji tekoşîna me ya aştî û demokrasiyê dûr bixin. Lê niha bi komkujiyên siyasî dixwazin me dûr bixin û bişkînin. Ji bo têkoşîna demokrasiyê tasfiye bikin her tiştî dikin. Lê ew çi bikin jî em li dijî operasyonên qirkirina siyasî û fizîkî serî û çong natewînin. AKP-MHP serî li hemû rêyên faşizan dide. Em qet çong natewînin. Dozgerê van operasyonên qirkirina siyasî Erdogan e. Her ku hilbijartinên herêmî nêzîk dibe dixwazin rêveberiyên herêmî desteser bike û ji ber vê yekê  van operasyonên siyasî didin destpêkirin. 

Em li dijî vê operasyona qirkirina siyasî ku di navde endam û nûnerên KCD, HDP, DBP, TJA, KÎD, TUHAD-DER, sendîkavan, rojnameger û akademisyen hene pêk hatiye çong danînin. Em dê her dem bibin heviya gelê xwe û têkoşîna xwe bêtir bilind bikin." 

 

Aydenîz, bal kişand ser serdegirtina mala HEvseroka KCD'ê û Parlamentera HDP'ê ya Colemêrgê Leyla Guven ku girtî dê darizandin û wiha got: “Bi polîtikayên faşîst ên ceberut, bê heq û bê hiqûq mirovan binçav dikin û digirin. Kesên daxwazên wan ên demokratîk hene binçav dikin û davên girtîgehê. Dixwazin bi van rêbazan me bêdeng bikin. Lê em tu car dest ji têkoşîna xwe ya mafdar bernadin. Em yek herin dê hezar  vegerin. Divê bila îtîfaqa faşîst a AKP-MHP'ê baş zanibe ku bi milyonan mirov ji bo tekoşina demokratîk amade ne."