Parlementera HDP'ê ya Colemêrgê û Hevseroka Kongreya Civaka Demokratîk (KCD) Leyla Guven ji ber daxuyaniyê xwe yên der barê operasyona Efrînê de di 31'ê Çileyê de hat girtin û hîn jî di Girtîgeha Tîpa E ya Amedê de ye. 

 

Piştî Parlementerê CHP'î Enîs Berberoglû di 20'ê Îlonê de hat berda, parêzera Guvenê Reyhan Yalçindag Baydemîr jî di 21'ê Îlonê de ji bo ebrdaba Guvenê serî li Dadgeha Cezayê Giran a 9'an a Amedê da. Yalçindag diyar kir ku heta niha dadgehê bersiva serlêdana wan nedaye. 

 

‘MAFÊ HILBIJARTINÊ TÊ BINPÊKIRIN' 

 

Parêzer Yalçindag, ji bo Guven tev li serdema nû ya Meclîsê û merasîma sondxwarinê bibe di 2'yê Cotmehê de serî li Dadgeha Cezayê Giran a 9'an a Amedê da. Yalçindag di daxwaznameya xwe de bi bîr xist ku piştî berdana Parlementerê CHP'ê Berberoglû, ji parlementeran tenê Guven di girtîgehê de ye. Yalçindag di daxwaznameyê de destnîşan kir ku li gorî madeya 19'an a Qanûna Bingehîn û madeya 5'an a "mafê bijartina serbest" a Peymana Mafên Mirovan a Ewropayê girtina Guvenê tê wateya binpêkirina mafê bijartina serbest. Yalçindagê, di daxwaznameya xwe de bilêv kir ku hemû delîl hatine berhevkirin û muwekîla wê nareve û her wiha ji bo tevdîra girtinê tu merc tune ne û xwest Guven bê berdan. 

 

HIQÛQEKE DUMENDΠ

 

Yalçindag, destnîşan kir ku heta niha bi tu awayî daxwaza wan a ji bo berdana Guvenê nehatiye bersivandin û got: "Em di 1'ê tev li serdema nû ya Meclîsê bûn. Ji bo berdana Leyla Guvenê me serî li Dadgeha Cezayê Giran a 9'an a Amedê da. Lê heta niah tu bersiv nehatine dayîn. Em ji vê re dibêjin pergala hiqûqê ya dumendî. Bi hiqûqên cuda nêzî rojhilatê welat û rojavayê welat dibin. Di her serdemê de ev yek wisa ye. Lê niha bi awayekî dijwartir didome. Parlementerê CHP'Î yê cezayê wî hat pesendkirin hat berdan, lê Guvena ku hîn nehatiye cezakirin nayê berdan."