STENBOL - Ji 11'ê Îlona 2016'an ve tu agahî ji Rêberê PKK'ê Abdullah Ocalan nayên girtin. Ji sala 2005'an heta niha 250 rojî cezayê hucreyê li Ocalan hatiye birîn.
Rêberê PKK'ê Abdullah Ocalan di 9'ê Cotmeha 1998'an de bi zext û zoriyên hêzên navnetewî ji Sûriyeyê hat derxistin. Piştî li Kenyayê hat girtin, ew anîn Tirkiyeyê û ji wê rojê ve di Girtîgeha Tîpa F a Îmraliyê de ye û bi awayekî dijwar tê tecrîdkirin.
Ji 27'ê Tîrmeha 2011'an ve parêzerên Ocalan nikarin hevdîtinê pê re pêk bînin û ji 5'ê Nîsana 2015'an ve jî Heyeta Îmraliyê nikare hevdîtinê pê re pêk bîne.
Berê ji bo hevdîtina malbatê asteng bikin hincetên wek "keştî xerabe ye", "rewşa hewayê nebaş e" dihatin berpêşkirin. Lê belê piştî hewldana darbeyê ya 15'ê Tîrmehê di çarçoveya Qanûna Jimare 5275'an de derbarê hikumxwaran de qanûnek hat derpêşkirin û hin tişt hatin sînordarkirin. Piştî ji ber şik û guman li raya giştî peyda bûn, di Îlona 2016'an de 50 siyasetmedar li Amedê dest bi greva birçîbûnê ya bê dem û bê dorveger kirin. Li ser vê destûr hat dayîn ku malbat bi Ocalan re hevdîtinê çêbike. Di 11'ê Îlonê de Mehmet Ocalan bi Rêberê PKK'ê Abdullah Ocalan re hevdîtin çêkir, lê belê ji wê rojê heta niha tu agahî ji Ocalan nayên girtin.
CEZAYÊ DÎSÎPLÎNÊ HAT BIRÎN
Di herdu serlêdanên dawî yên malbat Ocalan de, Serdozgeriya Komarê yaa Bûrsayê diyar kir ku du 14'ê Îlonê de "cezayê dîsîplînê" lê hatiye birîn û destûr neda malbat hevdîtinê pê re çêbike. Lê belê nayê zanîn ka ji ber çi cezayê dîsîplînê lê hatiye birîn.
250 ROJ CEZAYÊ HUCREYÊ LÊ HAT BIRÎN
Berê jî li Rêberê PKK'ê Abdullah Ocalan cezayên dîsîplînê hatibû birîn. Bi giştî 250 roj cezayê hucreyê li Ocalan ahtibû birîn. Sedema van cezayan jî ji ber nirxandinên wî yên der barê qirkirina çandî, mafê perwerdehiya bi zimanê zikmakî, parastina rewa, agirbest, aştî, çareseriya demokratîk û hwd.
Tenê di navbera 2005-2009'an de 200 roj cezayê hucreyê li Ocalan hat birîn. Piştî 2009'an jî 50 roj cezayê hucreyê lê hat birîn. Di dema van cezayan de hevdîtina bi Ocalan re hatibû qedexekirin, radyoya wî hatibû desteserkirin û pirtûk, rojname û kovar nedihatin dayîn.
Heta niha bi tu awayî nehiştin parêzerên Ocalan daxilî lêpirsînên dîsîplînê bibin û her wiha der barê cezayên hucreyan de jî heta niha tu teblîxat ji parêzeran re nehatiye şandin. Ev biryar tenê teblîxî Ocalan hatin kirin.