Li Îzmîeê kesên xwe wekî polîsan didin naskirin, gef li gelek eksan dixwin û şantajê dikin. Ji ber vê 19 kesî serî li Komeleya Mafên Mirovan (ÎHD) da. Li navçeya Konakê Mazlûm Acazê 28 salî yê di 14'ê Tîrmehê de hat binçavkirin û paşê hat berdan, ji ber vê yekê cara dudoyan e serî li ÎHD'ê da. Acaz, bilêv kir ku polîs rojê herî kêm 10 caran lê digerin û sîxurtiyê lê ferz dikin. Acaz, destnîşan kir ku dema hat binçavkirin polîsan jê re gotiye "karê te nebaş e, em ê alîkariya te bikin." Acaz, got polîsên sivîl tim tên dikana mobîlyan a lê dixebite û wî tacîz dikin. 

 

‘HEVJÎNA TE DUCANÎ YE, EM Ê ALÎKARIYA TE BIKIN' 

 

Acaz, diyar kir ku dema cara ewil wî serî li ÎHD'ê de heta hefteyekê polîs lê negeriyane, lê paşê dîsa geriyane. Acaz got, polîsan jê re gotiye: "Ji bo çi te serî li ÎHD'ê da? Em bi dostanî nêzî te bûn. Me xwest em alîkariya te bikin." Acaz got: "Dema di bin çavan de bûm, min birin odeyekê û bi min re xeber dan. Polîs ji min re got 'Peyva Kurdistan ji bo te tê çi maneyê? Tu esnaf î em alîkariya te bikin. Hem di warê aborî hem jî di warê kar de em ê alîkariya te bikin.' Min ev yek red kirin. Paşê hatim berdan. Paşê polîsekî bi navê Mîraç xwest bi min re pêwendiyê deyne. Min jê re got ev ehvdîtin ne qanûnî ye, lê di telefonê de tim bi ser min de dihat. Min di telefonê de ji polîsan re got hûn bi awayekî ne fermî bi min re pêwendiyê datînin, lê dîsa bi kêr nehat. Polîs ji min re got 'em dixwazin alîkariya te bikinç Tu hatiyî binçavkirin, mexdûr bûyî. Heke bixwazî em dikarin wesayîtekê peyda bikin. Em ê pere peyda bikin. Dê hevjîna te jî bi rihetê zaroka xwe bîne dinê.' Min jî ji wan re got 'ji bo çi hûn dixwazin alîakriya kesekî ji ber sedemên siyasî hatiye binçavkirin bikin?' Lê ji ber ku di demên dawî de zêde geriyan, min dîsa serî li ÎHD'ê da. Ji ber ku kargehên min ên berê hatin girtin, vê carê polîsan got ew dixwazin ji bo vekiran kargeha te alîkariya te bikin. Dîsa min qebûl nekir. hevjîna min ducanî ye û ev rewş zêde zêde min û derdora min nerihet dike." 

 

‘EZ Ê SERÎ LI DOZGERIYÊ BIDIM' 

 

Acaz, destnîşan kir ku polîs sîxurtiyê lê ferz dikin û gefan lê dixwin û got: "Tenê di dema binçavkirinê de bi polîsan re rû bi rû axivîm. Min tu tiştên wan qebûl nekir. Êdî bi telefonê nerihet dikin. Rojê 10 caran digerin. Dixwazim kesên bi heman tiştan re rû bi rû dimînin jî, li hemberî vê yekê dengê xwe bilind bikin. Bi vê yekê dixxwazin nebaweriyê têxiun nav mirovan. Li kargeha lê dixebitim karê min asteng dikin. Mudaxileyî jiyana min a taybet dikin. Eger ev rewş bidome ez ê serî li dozgeriyê bidim. Çi hewce be dixwazim bê kirin. Cara dudoyan e serî li ÎHD'ê didim. Eger dewam bike ez ê tevî parêzerê xwe daxwaznameyê binivîsim û giliyê wan bikim." 

 

MA / Ruken Demir