SEMSÛR – Endamê Meclîsa Şaredariya Komirê Erkan Karataş, diyar kir ku beriya Hevşaredarê Komirê Huseyin Yuka bê binçavkirin qeyûm tayînî şûna wî hat kirin û piştre bi hinceta li herêmê operasyon pêk hatiye Hevşaredar Yuka binçav kirin û ji peywirê girtin.
Li navçeya Komirê ya Semsûrê di 16'ê Tebaşê de operasyon pêk hat û di operasyonê de 4 eskeran jiyana xwe ji dest dan. Piştî bûyerê Hevşaredarê Komirê Huseyin Yuka hat binçavkirin û girtin. Endamê Meclîsa Komirê Erkan Karakaş, diyar kir ku operasyona li herêmê bi fermana Wezîrê Karên Hundir pêk hatiye û wiha got: "Piştî operasyon pêk hat 20 kes ji şaredariyê hatin binçavkirin. Tevî hevşaredar 8 kes hatin girtin. Serokê heyeta dadgehê got "Em ji bo ewlehiya te bistînin te digirin."
Karataş, anî ziman ku beriya Hevşaredar Huseyîn Yuka bê binçavkirin ji aliyê Wezîrê Karên Hundir ve qeyûm tayînî şûna wî kirin û wiha got: "Dema qeyûm tayînî şûna wî hat kirin wê demê Hevşaredar çûbû sersaxiya karkerekî ku di qezaya kana komirê de jiyana xwe ji dest dabû. Dema ji sersaxiyê vegeriya di rêde hat binçavkirin û piştre birin midûriyeta polîsan. Dema hat binçavkirin qeyûm tayînî şûna wî hatibû kirin." Karakaş, anî ziman ku ew û hevşaredar bi hevre hatin binçavkirin û wiha got: “Dema em hatin binçavkirin gotin 'Hûn li ser îxbara we alîkarî daye rexistinê' hûn hatine binçavkirin. Piştre derket holê ku ew îxbarek bê kok e. Dema bûyer pêk hat cihê ku em lê bûn bi dîmenan îspatkirî ye. Derket holê ku ew îxbar lîstik û hîle ye. Dema em hatin binçavkirin polîsan bêtir parvekirinên medya civakî ji me pirsî. Ez û hevşaredar bi hevre hatin binçavkirin. Ez pêvajoya wî dizanim. Hevşaredar li ser fermanê hat girtin."
Karakaş, da zanîn ku bi tayînkirina qeyûm raste rast şaredarî desteser kirin û bi vê yekî vîna gel jî desteser kirin. Karakaş, da zanîn ku dema şaredarên CHP, MHP û partiyên din ji peywirê digirin li gori zagonan tev digerin, lê dema qeyûm tayinî şûna yên DBP'ê kirin zagon binpê kirin û hiqûq nas nekirin.
DI 3 SALAN DE 20 HEZAR DARÊN ZEYTÛNAN ÇANDIN
Karakaş, da zanîn ku piştî hatin ser kar di nava 3 salan de gelek kar kirin û wiha axivî: "Şaredariya DBP di nava 3 salan de hemû xizmetên binesaziyê pêk anîn. Av, rê û kanalîzasyon temam kirin. Rêyên 11 taxan tev bi kevirên pêçayî rist. Şaredariyê li herêmê 20 hezar darên zeytûnan çandin. Lê piştî qeyûm tayîn kirin hemû xizmet û projeyên şaredariyê rawestiyan."