Parlementerê HDP'ê yê Sêrtê Siddik Taş, bertek nîşanî cezakirina Hevserokê Giştî yê HDP'ê berê û parlementerê HDP'ê yê berê Sirri Sureyya Onder da û anî ziman ku dê çewisandin û cezakirin nikaribin têkoşîna kurdan bişkînin. 

 

'EM BÊTIR LI BER XWE BIDIN' 

 

Taş, anî ziman ku partiya wan û gelê zêde tê çewisandin û got: "Cezakirina Onder û Demîrtaş tê wateya dê çewisandin dewam bikin, lê belê her ku ew zextan zêde bikin em ê jî têkoşîn û berxwedanê zêde bikin. Em baş dizanin ev ceza derî hiqûqê ne. Çimkî tu hêleke wê ya bi hiqûqê bê ravekirin tune ye. Qesr xwestiye tolê hilîne û bi fermana wê hatine cezakirin." 

 

'CEZA NIKARIN TÊKOŞÎNA KURDAN BIŞKÎNIN' 

 

Taş, diyar kir ku Leyla Guven jî di nav de gelek parlementerên HDP'ê hatine girtin û got: "Di salên 90'î de jî parlementerên kurd bi zext û zoriyan re rû bi rû diman. Ew zext û zorî niha jî didome. Rehmetî Orhan Dogan û Ahmet Turk û Leyla Zana hatin cezakirin. Ev ceza nikaribûn têkoşîna û berxwedana kurdan bişkînin. Bereksê vê kurdan têkoşîna xwe ya demokratîk domand. Sedema sereke ya ku siyasetmedarên kurd hîn jî têdikoşin ew e ku gel li cem wan e û niha jî gel bertek nîşanî vê cezakirinê da û got van cezayan nas nakin." 

 

'DÊ EV POLÎTÎKA JÎ BI KÊR NEYÊN' 

 

Taş, di dema Rewşa Awarte de li Sêrtê û tevahiya bajarên kurdan zext û zorî pir zêde bûn û got: "Her çend dawî li Rewşa Awarte hatibe jî, ev çewisandin didomin. Lê tevî van çewisandinan jî têkoşîna me dewam dike. Ev ceza û çewisandin bi zanebûnît ên kirin. Sedema van cezayan û çewisandinan ew e ku HDP'ê pasîfîze bikin. Duh jî ev polîtîka bi kêr nehatin, dê îro jî bi kêr neyên. Em ê tevî gelê xwe tim bertek nîşanî van pêkanînên kêfî bidin. HDP' tevî hemû çewisandinan jî niha li ser piay ye û sedema vê jî gel e." 

 

'EM Ê SERÎ NETEWÎNIN' 

 

Taş, diyar kir ku zext û zoriyên li ser kurdan ne ji serdema Komarê, ji dema Osmaniyan ve dewam dikin û got: "Duh jî û niha jî polîtîkaya înkarê tim dewam kiriye. Çawa ku duh me ev yek qebûl nekiribû, em ê sibê jî vê yekê qebûl nekin. Dewlet îdia dike ku ew kurdan nas dike. Rast e, bi kurdên ku çewisandina qebûl dikin û destê wan di destê dewletê de ye tev digere, lê kurdên ku li hember înkarkirinê û çewisandinan têdikoşe jî digire. Dewlet siyaseta kurdan qebûl nake, têkoşîna wan qebûl anke. Çawa me duh li ber çewisandinan serî entewandibe, em ê niha jî netewînin."