SILÊMANÎ - Nûnerên rêxistinên demokratîk û civakî yên Silêmaniyê darvekirin û êrîşên rejîma Îranê şermezar kirin
Gelek nûnerên rêxistinên demokratîk û civakî li bajarê Silêmaniyê êrîşa duh ya li dijî baregehê HDKA û HDK’ê û darvekirina 3’ê ciwanên Kurd a ji aliyê rejîma Îranê ve pêk hat, şermezar kirin. Di çalakiyê de ji herkesê hat xwestin ku li dijî xwîn rijandina rejîma Îranê rabin ser xwe û helwesta xwe bidin nîşandan. Koma li Parka Nalî kom bûn, li dijî darvekirina Zanyar Muradî, Loqman Muradî, Ramîn Hisên Penahî û êrîşa li dijî bargehên HDKA û HDK’ê pêkhat daxuyanî dan çapemeniyê. Di çalakiyê de xwestin ku her kes hestiyar tev bigerin. Li ser navê komê Umêd Mihemedemîn daxuyanî xwend û wiha got: “Rejîma Îranê duh li ber çavê hemû cîhanê ciwanên Kurd Zanyar Muradî, Loqman Muradî, Ramîn Hisên Penahî bi darvekir û êrîşek li ser hêzên muxalefet yên Rojhilatê Kurdistanê pêkanî. Ji bo vê em daxwaz ji hemû kesên azadîxwaz yên Kurdistanê dikin, da ku li dijî hemû êrîşên xwînrijandinê û êrîşên rejîma Îranê rawestin û xwedî helwest bin."
Mihemedemîn, ji hemû kesan xwest ku li hemberî van pêkanînên li ser kurdan tên meşandin bêdeng nemînin û wiha bi dawî kir: "Dixwazin Kurdistanê weke Surye, Yemen û Libyayê lê bikin. Em daxwaz ji hemû kesê dikin daku zextê li ser hikûmetê bikin daku êdî dewleta Îran van kiryarane neke û xwîn neyê rijandin.”
Piştî wê daxuyaniyên Komeleya Zindaniyên Siyasî û Eniya Nîştimanî a li dijî Dagirkeriyê jî hatin xwendin. Di daxuyaniyan de êrîşa li ser baregehên HDK û HDKA û bi darve kirina 3’ê ciwanên Kurd hat şermezar kirin. Piştî daxuyaniyan girseyê dirûşmeyên li dijî darvekirina Ramîn, Zanyar û Loqman avêtin û çalakî bidawî bû.
Îranê duh li navçeya Koyeyê ya Hewlêrê li dijî baregehên Hizba Demokrata Kurdistanê-Îranê (HDKA) û Hizba Demokrata Kurdistanê (HDK) ya li Kelhê êrîş pêk anibû û 15 endamên HDK'ê û 2 pêşmergeyên HDKA'yê jiyana xwe ji ji dest dabûn. Zêdeyî 40 kesan ji birîndar bûbûn. Dîsa rejîmê duh 3 ciwanên Kurd Ramîn Hisên Penahî, Zanyar Muradî û Loqman Muradî darve kiribûn.