Komîsyona Girtîgehan a Şaxa Komeleya Mafê Mirovan (ÎHD) a Stenbolê bi boneya balê bikişîne ser rewşa girtiyên nexweş û bên berdan di hefteya 337’emîn de çalakiya “Rûniştina F” berdewam kir. Bi boneya Qada Galatasarayê li çalakiya hatiye qedexekirin vê hefteyê jî li avahiya Şaxa ÎHD’a Stenbolê çalakî pêk hat. Di çalakiyê de dirûşm hatin berzkirin û pankartên “Mafê dermankirinê nayê astengkirin” û “Bila girtiyên nexweş bên berdan” hildan. 

 

Di çalakiyê de endama Komîsyona Girtîgehan a ÎHD’ê Hatîce Onaran daxuyanî xwend û diyar kir ku li girtîgehan binpêkirina mafan dewam dike û bêdermankirina girtiyan dibe cezakirina duyem a li dijî girtiyan. 

 

Onaran behsa rewşa girtiyê nexweş ê şîzofren Azîz Bayin kir û wiha got: “Azîz Bayin 8 sal e girtî ne. Ji ber dosyeyek siyasî di salên 2010-2011’an de 4’emîn Dadgeha Cezayê Giran a Amedê 12 sal û nîv û 5’emîn Dadgeha Cezayê Giran a Amedê jî 2 sal ceza lê birî. Bi giştî 14 sal ceza lê hat birîn. Bayin ji girtîgeha Amedê şandin Girtîgeha Edîrneyê û piştî vê sewqê rewşa derûniya wî xera bû û bi teşhîsa şîzofren wî sewqî Girtîgeha Maltepeyê kirin.” 

 

NAMEYA BAYIN HAT XWENDIN 

 

Onaran nameya Azîz Bayin ji girtîgeh şand xwend. Nameya Bayin wiha ye: “Ez dermankirina derûnî û şîzofren dibînim. Di meha tebaxê de eskeran min du caran bir nexweşxaneyê û her du caran jî min derb kirin. Bi kelepçekirî min derxistin cem diktor û destên min venekirin. Eskeran li gel diktor ji min re got ‘tu terorîstî.’ Û pişt re min xistin hucreyê. Li dijî vê rewşê min ji Dozgeriya Komarê re gilî kir. Lê bersiva neşopandinê dan gilîkirina min. Her wiha bi keça min re nexweşîna losemiyê heye û nikare were hevdîtina min. Ez dixwazim min sewqî girtîgehek nêzî malbata min bikin. Ez ditirsim ku her kêlî wê winda bikim. Bila daxwaza min a sewqê çareser bibe.” 

 

Onaran her dawî xwest hemû girtiyên nexweş demildest bên berdan.