Çalakiya hefteya 700'emîn û ya hefteya 701'emîn a Dayikên Şemiyê ya li Qada Galatasarayê hatibû astengkirin. Seroka Şaxa Komeleya Mafên Mirovan (ÎHD) a Stenbolê Gulseren Yolerî û Besna Tosûn, keça Fehmî Tosûnê di 19'ê Cotmeha 1995'an de di bin çavan de hat windakirin, bertek nîşanî qedexekirina çalakiyê dan. 

 

'POLÎTÎKAYA HIKÛMETÊ YE' 

 

Yolerî, destnîşan kir ku qedexekirin derî qanûna bingehîn, peymanên navnetewî û îçtihadên DMME'yê ne û got: "Her çend li bin biryara qedexeyê îmzeya qeymeqam hebe jî, Wezîrên Karên Navxweyî û berdevkê partiyê der barê çalakiya Dayiên Şemiyê de daxuyaniyan didin. Yanî hincetên ji bo vê qedexeyê hatin dayîn û hincetên sereke cuda ne. Çimkî di hinceta berpêşî me hat kirin de tê diyarkirin ku ji ber beşdarbûyîn zêde ye dibe ku kesên nediyar tev lê bibin û provakasyon çêbibin. Lê hem qedexe li qadeke fireh belav dibe û hem jî daxuyaniyên ku berdevkên hik»metê dan nîşan dide ku ev yek polîtîkaya hikûmetê ye." Yolerî bilêv kir ku di dema Rewşa Awarte de jî qedexeyên bi vî rengî tune bûn. 

 

‘DÊ ÇALAKÎ BÊNAVBER DEWAM BIKE' 

 

Yolerî, anî ziman ku ew qedexekirina mafekî qanûnî û demokratîk û aştiyane qebûl nakin û dê çalakî bênavber dewam bike. Yolerî, diyar kir ku têkoşîna Dayikên Şemiyê xwe dispêre daxwazeke sereke û got: "Em baş dizanin ku ev daxwazeke mafdar e. Astengkirina Dayikên Şemiyê xelet e. Me di hemû hevdîtinên xwe yên bi rayedaran de me têkoşîna Dayikên Şemiyê ya 23 salan vegot. Çimkî Qada Şemiyê, qadeke ku Dayikên Şemiyê hebûna xwe lê pêk anîn. Dema zarokên wan sax bûn li vê qadê dest bi vê têkoşînê kirin." 

 

Yolerî, diyar kir ku divê demildest dev ji vê qedexekirinê bê berdan û got: "Heta ku dewlet dev ji vê şaşiya xwe berde, dê çalakiya Dayikên Şemiyê dewam bike." 

 

‘QADA GALATSARAYÊ BÎRA VÎ WELATÎ YE' 

 

Besna Tosûn, keça Fehmî Tosûnê ku di bin çavan de hat windakirin, diyar kir ku protestoya ku ew 701 hefte ye pêk tînin protestoyeke rew û mafdar e û got: "Qedexekirina çalakiya Dayikên Şemiyê careke din nîşan da ku hiqûq pêk nayê. Peywira dewletê ew e ku sûcan derxîne holê û sûcadarn bidarizîne. Lê belê rayedar bi daxuyaniyên xwe sûcdaran diparêzin û bûne hevparê vî sûcî. 3 nifş li vê qadê li windayên xwe digerin. Heta em windayên xwe nebînin, kiryara neyên darizandin em ê bitêkoşin. Kesên dewletê bi rêê ve dibin, divê demildest dev ji vê çewstiya xwe berdin." Tosûn, diyar kir ku Qada Galatasarayê bîra vî welatî ye û got: "Qada Galatsarayê bîra vî welatî ye. Dê ev bîr tim zînde be." 

 

MA / Melike Ceyhan