Girtiyê nexweş Sabrî Kaya (53) ku di Girtîgeha Tîpa T a Jimare 2'yan a Osmaniyeyê de ye û nexweşîna dil pê re heye, her diçe rewşa wî girantir dibe. Tevî nexweşîna dil a Kayayê ku cezayê muebetê lê hatiye birîn, hestiyên wî jî dihelin, nexweşîna şekir, tansiyon û kolestrol jî di nav de gelek nexweşînên wî hene. Saziya Tiba Edlî û nexweşxane rapora "dikare di girtîgehê de bimîne" dan Kaya, lê belê Kaya ji ber nexweşînên xwe nikare pêdiviyên xwe pêk bîne. 

 

Kaya di hevdîtina vekirî de der barê binpêkirinên mafan û nexweşîna xwe de axivî. 

 

‘DI GIRTÎGEHÊ DE BAŞ NABIM' 

 

Kaya, diyar kir ku qalpaxa dilê wî riziyaye û got: "Di girtîgehê de du caran ji dilê xwe emeliyat bûm. Di emeliyata sala 2016'an de qalpaxa dilê min hat guherandin. Piştî emeliyatê, bêyî ku birînên min bicebirin ez tabûrcî kirim û anîn girtîgehê. Êşa min piştî emeliyata du sal berê hîn jî dewam dike. tevî vê şekir, kolestrol û tansiyon jî bi min re heye û hestiyên min dihelin. Piştî ketim girtîgehê ev enxweşîn li min peyda bûn. Di girtîgehê de baş nabim. Niha jî divê pûlê têxin dilê min. Divê careke din jî emeliyat bibim. Lê tê gotin îhtimala ku di dema emeliyatê de bimirim jî heye." 

 

‘MEŞ LI MIN FERZ KIRIN' 

 

Her wiha astim jî bi Kaya re heye. Kaya ji bo dema wî bi rîngê dibin nxweşxaneyê jî got: "Mehê du caran diçim nexweşxaneyê. Herî dawî dema çûm, ji ber ku rîng pir biçûk bû û bê hewa bû, bêhna min dernediket. Min ji wan re got wesayîtê bisekinînin, lê gotin 'heta nexweşxaneyê îdare bike.' Ji ber  vê ji ser hişê xwe çûm. Bêhna min çikiya. Dema em gihaştin nexweşxaneyê û derî vekirin ketim erdê. Gotin 'rabe bimeşe.' Min got nikarim bimeşim, divê sedye hebeç Gotin 'na, em nikarin bînin. Tu yê bi vî awayî bimeşî.'" 

 

Her wiha Kaya bilêv kir ku di çûnhatina nexweşxaneyê de tê kelemçekirin û got: "Divê bijîşk bibêjin nabe ku nexweş bi rîngê bînin. Lê bijîşk jî naxwazin xwe bavêjin rîskê. Jixwe eleqedar nabin. Herî dawî dema çûm nexweşxaneyê bijîşk got 'wî bibin tiştekî wî tune ye.' Bêyî kontrol bike ez şandim. Dema me ev yek gilî kir gotin 'li nexweşxaneya me tiştên wisa çênabin.'" 

 

LI QAWÎŞA 4 KESÎ 14 KES DIMÎNIN 

 

Kaya, diyar kir ku ew li qawîşa 4 kesî 14 kes dimînin. Kaya, anî ziman ku ji ber qada wan a jiyanê pir teng e, ev yek tesîrê li tenduristiya wî dike. Kaya, destnîşan kir ku ji ber nexweşîna wî divê xwarinên diyetê bixwe û got: "Her kes çi dicwe ez jî heman xwarinê dixwim. Ji ber diyabet im, divê xwarinên bê xwê û bê rûn bixwim. Min ev yek ragihandiye, lê dîsa jî pêk nayînin. Ji ber wekî din tu çare tune ye, ji mecbûrî xwarina didin dixwim." 

 

RAPOR NEDAN 

 

Kaya, da zanîn ku di emeliyata berê de desteya tenduristiyê rapora "nikare di girtîgehê de bimîne" dana wî û got: "Ji ber ku wê çaxê Saziya Tiba Edlî ev yek red kiribû nehatim berdan. Niha me careke din jî serî lê da. Li gor du sal berê rewşa min pir xirab e. Lê belê Saziya Tiba Edlî vê carê jî rapora 'di kare di girtîgehê de bimîne' da min. Qanûnên xwe çêkirina. Pêkanînên kêfî dikin." 

 

Her wiha Kaya, bilêv kir ku rêveberiya girtîgehê dest datîne ser nameyên wan û bi vî awayî naxwaze derve hay ji binpêkirinên mafan ên li girtîgehê çêbibe. Kaya, destnîşan kir ku li girtîgehê baş nayê tedawîkirin û got: "Bila dev ji van pêkanînên kêfî berdin." 

 

MA / Melike Ceyhan