AMED – Welatiyan di 1’ê Îlonê Roja Aştiyê ya Cîhanê de aştiyê daxwaz kirin û diyar kirin ku bi şerê tê birêvebirin de zilma dewletê ya li ser kurdan zêdetir bûye û gotin: “Bila tu kes nemire. Bila êdî ev xwîn bê sekinandin û aştî were.”
Welatiyan di mitînga 1’ê Îlonê Roja Aştiyê ya Cîhanê ya li Qada Îstasyona Amedê aştî daxwaz kirin û diyar kirin şewata daristanan, tecrîdkirina Rêberê PKK’ê PKK’ê Abdullah Ocalan û qedexekirina çalakiya xizmên windayan rexne kirin û vê yekê wek çareserî nedîtin û li dijî şer derketin.
‘ÎNSAN JI HEV HATIN QETANDIN’
Ji welatiyên beşdarî mitîngê bû Azad Alak diyar kir ku bi şerê heyî re zilma dewletê ya li ser kurdan zêdetir dijwar bûye û got: “Gelê kurd bi hesreta aştiyê dişewite. Heke şer bi dawî bibe, dê mirov bextewar û aram bibin. Di du salên dawî de însanan li dij hev kirin dijmin û ji hev qetandin.”
‘ŞER HILWEŞANDIN E’
Mahmut Akdamiş jî anî ziman ku her kes ji aştiyê sûd werdigirin û şer jî rûxandin e û dibe sedemê mirina mirovan, rijandina rondik û xwîna mirovan.
‘DIVÊ DEWLET BI KURDAN RE RÛ BI RÛ BIBE’
Lamî Çelîk jî da zanîn ku ji bo çareserkirina pirsgirêka kurd divê dewlet ewil bi kurdan rû bi rû bibe û got: “Divê dewlet bi malbatên zarokên wan jiyana xwe ji dest dane re hevrû bibe. Dizanin ku tengezariya gelê kurd çi ye. Çima gelê kurd dimire.”
‘ZIMAN WELAT DABEŞ NAKE’
Zîlan Bayram jî destnîşan kir ku axaftina zimanê zikmakî ya gelê kurd dê welat parçe neke û daxwaza ziman aştiye û vê aştiyê li wan vedigerînin şer. Bayram got qedexekirina çalakiya Dayikên Şemiyê û xizmên windayan jî wek bêdaletî û bêhiqûqî nirxand û vê yekê wek sûcê mirovahiyê pênase kir.
‘BILA EV XWÎN BÊ SEKINANDIN’
Sevîl Oztunç jî got ew naxwazin tu kes jiyana xwe ji dest bide û wiha domand: “Bila ne esker, ne polîs û ne jî gerîla jiyana xwe ji dest bidin. Bila êdî ev xwîn bê sekinandin. Bila aştiyek bixêr were.”
Meryem Yaşar jî diyar kir ku gelê kurd ji bilî aştiyê daxwaz nakin û got: “Dema kurd tê gotin para wan kuştin û girtin e. Em aştiyê ji bo Abdullah Ocalan, girtiyan, yên li çiyayan û zarokên xwe dixwazin.”
‘KURD AŞTIYÊ DIPARÊZIN’
Naîf Subaşi jî da zanîn ku kurd aştiyê û wekheviyê diparêzin û li dijî şer û kuştinê ne û cudakarî û hilweşandinê naxwazin. Subaşi got qedexekirin û mudaxeleya li dijî Dayikên Şemiyê û xizmên windayan nayê qebûlkirin û ew bi tundî şermezar dike.