ENQERE - Platforma Ked û Demokrasiyê ya Enqereyê xwest kesên li GAR'a Enqereyê di 10'ê Cotmeha 2015'an de hatin qetilkirin bibîr bîne. Lê polîsan mudaxaleyî çalakiya bîranîna Komkujiya Enqereyê kir. Polîsan qalkirina çalakiya Dayikên Şemiye hincet nîşan da û mudaxale kir. Çalakgeran jî bi gotina "Werin me jî bikujin" û bertekên xwe anîn ziman.
Platforma Şaxan a KESK'ê, ÎHD, Odeya Tabîban, DÎSK, ÇHD, OHP, Komeleya 10'ê Cotmehê û gelek rêxistinên din bi minasebeta 1'ê Îlonê Roja Aştiya Cîhanê, xwestin li GAR'a Enqereyê kesên di 10'ê Cotmehê de li GAR'ê di teqînê de jiyana xwe ji dest dan bibîr bîne. Lê polisan mudaxale kir û destûr nedan kesên di 10'ê Cotmehê de hatin kuştin bibir bîne. Polîsan pêş GAR'ê bi dehan maşîneyên zirxî û hêzen çevîk dorpêç kir û barikat danîn. Li aliyê din xizmên windayan û rêxistinên civakî pankarta ku wêneyên kesên di 10'ê Cotmehê de hatin qetilkirin li ser heye û qurnefilên sipî rakirin. Girse li pişt pankarta “Ger ku çiqa mirov û mirin jî westiya be, niha helbesta herî xweş aştî ye." vekirin û meşiyan. Girsê di meşê de dirûşmeya "Ji şer re na, aştî hema niha" berz kirin. Girsê piştî meşê ji bo kesên di 10'ê Cotmehê de jiyana xwe ji dest dane deqeyekê rêz girtin. Li ser navê hemû rêxistin û saziyan Hevseroka Şaxa ÎHD'ê ya Enqereyê Saliha Şahin odaxuyaniya hevpar xwend.
'PÊWISTIYA ME JI HEVIYA AŞTIYÊ HEYE'
Şahin, diyar kir ku di vê pêvajoya ku çekên kîmyewî tên teqandin, şerê nijadî û mezhepî pêş dikeve 1'ê Îlonê Roja Aştiya Cîhanê piroz dikin û wiha got: "Di bin navê ewlehiyê de daristan tên şewitandin. Li şûna diyalog û zimanê aştiyê ya nava welatan şer tercîh dikin. Di vê hêvajoyê de hem li herêmê û hem jî li Rojhilata Navîn pêdiviya me bi aştiyê heye. Divê hemû mirovên alîgirê wekhevî, azadi, edalet û atiyê, pêwiste heviya aştiyê mezin bikin. Em bang li hemû kesan dikin ku heviya aştiyê bilind bikin."
Dayika Korkmaz Tedik a EMEP'î ku di 10'ê Cotmehê de hat kuştin, Zohre Tedik jî anî ziman ku di 2015'an de kurê wê ji ber aştî xwest hat kuştin û wiha got: Gelek kesên din ku bi heman daxwazê hatin cem hev, xizmên xwe winda kirin. Ji bo mirov neyên kuştin em li vir têdikoşin. Çi dibe bila bibe em dê daxwaza xwe ya aştiyê berdewam bikin. De her dem di 1'ê Îlon û 10'ê Cotmehê de daxwazên me yên aştiyê bilind bibin."
Parlamentera HDP'ê ya Enqereyê Filiz Kerestecîoglu jî 103 miroavên li qada GAR'ê hatin kuştin bibîr anî û sersaxî ji malbatê re xwest. Kerestecioglu, diyar kir ku wekî Dayikên Şemiyê îro di hefteya 701’an de îro çawa Dayikên Şemiyê li Stenbolê rûnên em jî dê li vir runên. Dema Kerestecîoglu, axaftina xwe berdewam dikir, polîsan bi hinceta qala Dayikên Şemiyê kiriye mudawale kir. Polîsan girse belav kir pankarta ku navê kesên di 10'ê Cotmehê de jiyana xwe ji dest dabûn li ser hatibû nivîsandin a “Bila navê te aştî be" çirandin. Polîsan tenê destûr da komekê ku qurnefilan dînin cihê bûyerê. Malbatan bertek nişanî polîsan da û gotin "Werin me jî bikujin."
Piştî rageşiyê girsê dirûşmeya “Ji şer re na, aştî hema niha" û “Hêrsa dayikan dê qatilan bifetisine" berz kirin. Polisan bi sedema wêne kişandiye xwest kesekî binçav bike. lê girsê destûr neda. Çalakî bi dirûşmeyan bi dawî bû.