Seroka Komeleya Freunde Helfen Freunden (Dost Alîkariya Dostan Dikin) Aygul Aras, diyar kir ku tiştên niha li Dersimê pêk tên dewam polîtîkayên bêxalîkirina ji mirovan a sala 1938'an e. 

 

Komeleya Freunde Helfen Freunden li Almanyayê ji bo alîkariya mexdûrên şer bike hatiye avakirin. 

 

HEMAN TIŞT CARA SÊYEMÎN DI DEWRÊ E YE 

 

Aras, diyar kir ku şewitandina daristanan hêleke polîtîkaye xalîkirina ji mirovan e û got: "Her çend hin hincetan bidin der jî, lê belê em hemû baş dizanin ku şewitandina daristanan di çarçoveya polîtîkayên dewletê yên plankirî de tên kirin. Li Dersimê di 1938'an de ji bo tunekirinê bi ser neketin. Di 1994'an de bi valakirina gundan dîsa ceribandin. Niha jî cara sêyem diceribînin. Dixwazin vê erdnîgariyê bişewitînin da ku kes lê nejî. Gundên me, xwezaya me, cihwarên me yên baweriyê tên şewitandin û tunekirin. Texrîbatên hovane ên salên 90'î dewam dikin. Aşkere ye ku armanca vê polîtîkayê ew e ku herêmê ji mirovan xalî bikin û xwezayê talan bikin." 

 

‘HER CURE RÊ Û RÊBAZ TÊN CERIBANDIN' 

 

Aras, daxuyaniya Walîtiya Dersimê ku gotibû li herêmê aramî heye nirxand û got: "Bajar bi qaleqol, qûle û noqteyên kontrolê hatiye dorpêçkirin. Mirov nikarin serbest bigerin. Dema hûn bixwazin biçin deverekê an hûn bi wesayîtên zirxî re rû bi rû dimînin an jî hûn bi pêkanînên şerê derûnî re rû bi rû dimînin. Diçim gundekî ku 10 mal lê ne, lê bi dehan cendirme lê hene. Bi rastî jî dixwazin mirovan bêzar bikin. Ji bo mirov warê xwe biterikînin her cure rê û rêbaz tê ceribandin. Ma li herêma ku şer lê hebe dê çawa aramî hebe?" 

 

‘BI PIŞTEVANIYÊ EM DIKARIN JI DERHEQÊ VÊ YEKÊ DERKEVIN' 

 

Aras, ji bo tefandina agir divê h-mirov hêvî ji kesên dişewitînin neke û got: "Banga min ji bo dersimiyên li rojavayê welat, li dîasporayê dijîn; bi piştevaniyî tev bigerin. Ev erdnîgarî careke din bi talûkeyan re rû bi rû ye û divê li hemberî van polîtîkayan em bi hev re tev bigerin. Bi piştevaniyê em dikarin ji derheqê vê pêvajoyê derkevin."