ENQERE – Parlamenterê HDP’ê Kemal Bulbul diyar kir ku li Dersimê “Qanûna Tuncelî” tê nûjenkirin û got: “Seyîd Riza bang dike, Elîşêr bang dike. Em di serî de civaka elewî û hemû aliyan vedixwînin vemirandina şewata li Dersimê.”
Komeleya Dersimiyan a Enqereyê têkildarî şewata li Dersimê ya ji ber operaysonên leşkerî derket civîna çapemeniyê li dar xist. Civîn li Yekîtiya Mulkiyeyayan pêk hat û Wekîlê Serokên Koma HDP’ê Ayhan Bîlgen, Parlamenterê HDP’ê yê Antalyayê Kemal Bulbul, Hevserokê Giştî yê Komeleya Mafê Mirovan (ÎHD) Ozturk Turkdogan, Sekerterê Giştî yê Komeleya Çandê ya Pîr Sultan Abdal (PSAKD) Onur Şahîn, Serokê Komeleya Dersimiyan a Enqereyê Yaşar Kilavuz û gellek nûnerên saziyan beşdar bûn.
Serokê Komeleya Dersimiyan a Enqereyê Yaşar Kilavuz di civînê de axivî û diyar kir ku ji bo vemirandina şewatê di serî de dersimi û lazim e hemû hawirdorparêz, ekolojîst û hemû alî hevpar tevbigerin û mudaxeleyî şewatê bikin.
KILAVUZ: PIŞTÎ HER PEVÇÛNÊ DARISTANÊN ME DIŞEWITÎNIN
Kilavuz anî ziman ku divê dewlet berpirsyariya xwe ya xwedîderketina li daristanan bîne cih û dewlet xwedî li daristanên Dersimê dernakeve. Kilavuz got dewlet heyetên ji bo vemirandina şewatê asteng dike û got: “Em ji daxuyaniya Waliyê Dersimê re jî ne biyanî ne. Piştî her pevçûnê agir bi daristanên me dixînin. Em diyar dikin ku wê hemû gelê Dersimê xwedî li nirxên xwe dîrokî û xwezaya xwe derkeve. Em bang li hemû xwezaparêz û ekolojîstan dikin ku xwedî li daristanên me derkevin. Di şer de jî divê destê xwe nedin daristanan, lê mixabin dişewitînin. Bi salan e daristanên me bi awayek bêwîjdan tê şewitandin.”
TURKDOGAN: MIROVAHÎ LI DERSIMÊ TÊ ŞEWITANDIN
Hevserokê Giştî yê ÎHD’ê Ozturk Turkdogan jî got: “Li Dersimê cudakarî, nefret û wêdekirinek talûke heye. Pratîkek dijminahî tê nîşandan. Heke ev welat ê me hemûyan be, divê em xwedî li Dersimê derkevin. Tişta li Dersimê tê şewitandin nirxê mirovahiyê ye. Mixabin tenê ne li dijî mirovan binpêkirina mafan heye. Li dijî xwezayê jî binpêkirina maf heye. Ev sûc e. Hem jî sûcê giran e. Ez bang li wan kesên wê axê bombebaran dikin re dibêjim, hûn sûc dikin. Viya nekin. Qanûnek vê derfeta şewatê û bombebaranê dide we nîne.”
BÎLGEN: TABLOYEK KU NAYÊ RAVEKIRIN HEYE
Wekîlê Serokên Koma HDP’ê Ayhan Bîlgen jî çavdêriyên li Dersimê vegotin û wiha axivî: “Li ser fermana waliyê Dersimê çûna me ya herêma şewatê hat astengkirin. Me li sûkê esnafan silav kir û em bi wesayîtan derketin rê. Em çûn nêzî Xozatê. Me li nokteya ewil sekinandin û ji me re gotin ‘hûn nikarin di vir de biçin.’ Me got kengê rê hatiye girtin. Gotin ku roja em çûn hatiye girtin. Yanî bi çûyîna heyeta me re rê hat girtin. Em ketin rêyek din. Polîs li wir jî pêşiya me birîn û rê girtin. Me carek din rêyek din ceriband. Vê carê eskerên li ser wê rêyê jî rêya me girtin. Ji bilî me rê ji her kesî re vekirîbû. Tenê destûr nedan heyeta me. Em bi tabloyek ravekirina wê nayê kirin re rû bi rû man.”
BULBUL: ‘QANÛNA TUNCELÎ’ NÛJEN DIKIN
Parlamenterê HDP’ê yê Antalyayê Kemal Bulbul ê di heyetê de cih girt jî wiha got: “Seyîd Riza bang dike, Elîşêr bang dike. Em di serî de civaka elewî û hemû aliyan vedixwînin vemirandina şewata li Dersimê. Li Tirkiyeyê ‘Qanûna Tuncelî’ ya di sala 1935’an hebû. Niha tiştên diqewimin nûnejnkirina ‘Qanûna Tuncelî’ ye. Mijar tenê ne daristanin. Hemû nirxên mirovahiyê tên şewitandin û tunekirin. Hemû zindewar û xweza tê talankirin.”
ŞAHÎN: DIXWAZIN DERSIMÊ BÊMIROV BIKIN
Sekreterê Giştî yê PSAKD’ê Onur Şahîn jî got: “Dewlet dixwaze bi şewata daristanan çand, bawerî û mirovahiya li Dersimê tune bike. Ev jî berdewama polîtîkaya sîstematîk e. Ji bo me her bihost axa Dersimê pîroz e. Nirxên me li wir hene. Dewlet dixwaze Dersimê bêmirov bike. Divê di serî de Dersimî û hemû mirovahî li av, ax û xwezaya Dersimê derkeve.”