KOCAELÎ - Broşura bi sernavê "Di doktrîna zana de nêrîna li marksîzm û feminîzmê de" ya girtiya PKK'yî Ferda Îldan ku cezayê muebetê lê hatiye birîn û 24 sal in di girtîgehê de ye, nivîsand û ji Girtîgeha Tîpa M a Wanê re şand, wekî broşureke "bifikare" hat dîtin. Ji ber broşurê înfaza Îldanê hat şewitandin.
Rojnamevan Meltem Oktay ku ji ber nûçeyên xwe yên li navçeya Mêrdînê hat girtin, ji Girtîgeha Tîpa M a Gebzeyê nûçeyek nivîsand û ji Ajansa Mezopotamyayê re şand. Nûçeya ku Oktay nivîsandiye wiha ye: Ferda Îldana ku cezayê muebetê lê hatiye birîn û 24 sal in girtiye û dê 6 sal şûnde bihatana berdan, ji ber dozeke lê hat vekirin înfaza wê hat şewitandin. Îldan di sala 2017'an de broşureke bi ser navê "Di doktrîna zana de nêrîna li marksîzm û feminîzmê de" nivîsand û ji Girtîgeha Tîpa M a Wanê re şand. Broşur di Komîsyona Xwendinê ya Tîpa M a Gebzerê re derbas bû, lê belê Komîsyona Xwendinê a Girtîgeha Tîpa M a Wanê broşurê wekî broşureke "bifikare" dît û der barê Îldanê de lêpirsîn da destpêkirin. Îdareya Girtîgehê dosyeyê ji Dozgeriya Girtîgeha Gebzeyê re şand. Dozgeriyê bi îdiaya "propgandaya rêxistinê" îfadeya Îldanê girt.
Îldan di îfadeya xwe de diyar kir ku di nivîsê de tiştekî ku bibe sedema propagandayê tune ye û got: "24 sal in ez kadroya vê rêxistinê me û min nivîs ji hevala xwe re şand. Ji bo çi ez ê propagandayê ji hevala xwe re bikim? Di qanûnê de cihê vê yekê tune ye."
Dozgeriyê piştî îfadeyê dosye ji Girtîgeha Cezayê Giran a 5'an a Kocaeliyê re şand dadgehê bi îdiaya "propagandaya rêxistinê" 5 meh ceza li Îldanê birî.
ÎNFAZA WÊ HAT ŞEWITANDIN
Piştî çend mehan şûnde cezayê li Îldanê hat birîn ji Daîreya Ceza a 2'yan a Dadgeha Edliyeyê ya Herêmê ya Stenbolê re hat şandin. Îldan bi rêya SEGBÎS'ê tev li danişînê bû û di danişînê de dozger ji Îldanê re got: "Kî doza propagandayê li te kiriye? Ya ku te kiriye, axaftinên te û sekna te bi zanebûnî alîkariya ji bor êxistinê ye." Bi vî awayî doz veguherandin doza "alîkariya ji bo rêxistinê" û ceza li Îldanê hat birîn û înfaza wê hat şewitandin.
'MÎNAKA BÊHIQÛQIYÊ'
Îldan, diyar kir ku piştî muddetname gihaştiye destê wê ew hay jê çêbûye ku înfaza wê hatiye şewitandin. Îldan, diyar kir ku nivîsa ku wê şandiye pêşî di komîsyona xwendinê ya girtîgeha lê girtiye re derbas bûye, lê belê girtîgeha din nivîsa wê wekî nivîseke "bifikare" dîtiye. Îldan, destnîşan kir ku ev yek mînaka bêhiqûqîtiyê ye û got: "Di nivîsa ku min nivîsand de tiştekî bibe cihê sûc tune ye. 24 sal in ez kadroya vê rêxistinê me û min nivîs ji hevala xwe re şand. Ji bo çi ez ê propagandayê ji hevala xwe re bikim? Her wiha bi ser de dosye veguherandin dosyeya alîkariyê. Ev yek rewşeke trajîkomîk e. Jixwe nivîs negihaşt ber destê hevala min, loma tu sûcî teşkîl nake. Der barê vê yekê de di dest min de biryareke emsal heye. 'Ji ber ku endama PKK'ê ye heta cezayê wê biqede tu sûc lê nayê barkirin.' Me ev yek berpêşî dadgehê jî kir, lê belê dadgehê guh neda biryara emsal."
ÎTIRAZ KIR
Îldan, bilêv kir ku ev biryar biryareke polîtîkaya tepisandinê ye û got: "24 sal in ez vê bêedaletiya hiqûqê qebûl nakim û ji niha û pê de jî ez ê qebûl nekim. Dîroka berdana min 25'ê Adara 2015'an bû. Bi vê dosyeyê înfaza min hat şewitandin û dîroka berdana min taloqî 2031'ê kirin. Hiqûq wekî her carê bi awayekî bîrdoziyî nêz bû. Min îtiraz li vê yekê kir. Ez vê yekê qebûl nakim. Divê raya giştî li hember vê derhiqûqiyê bi hesas tev bigere."