Bi fermana Wezîrê Karên Navxweyî Suleyman Soylû, çalakiya hefteya 700'emîn a Dayikên Şemiyê hatibû qedexekirin û polîsan mudaxileyî çalakiyê kiribû. Her wiha Soylû der barê vê yekê de daxuyanî dabû. Her wiha di sala 2011'an de têkildarî rewşa windayan serokwezîrê wê demê Recep tayyip Erdogan li Dolmabahçeyê bi dayikan re civînek çêkiribû, lê belê sozên di wê civînê de hat dayîn hîn jî bi cih neaniye. 

 

‘SEDEMA HEVDÎTINÊ HILBIJARTIN BÛ' 

 

Hanîfe Yildiz, dayika Mûrat Yildizê ku di sala 1995'an d eli Îzmîrê hat binçavkirin û paşê hat windakirin, jî tevî civîna ku Erdogan bi dayikan re çêkiribû bibû. Yildiz got: "Me hemûyan behsa windayên xwe kir. Got 'Lê ev yek di serdema me de nehatine kirin. Lê dîsa jî çi ji destê min bê ez ê bikim.' Herkesî spasiya wî kir, lê min got 'ez spas nakim.' Jixwe ji weziyeta Erdogan min fêm kiribû ku dê tiştekî neke. Wê çaxê tekane sedema ku hevdîtin bi me re çêkir, hilbijartin bûn. Jixwe paşê me hemûyan dît ku tiştek jî nekir." 

 

‘SOYLÛ DIXWAZE CIHÊ XWE SAXLEM BIKE' 

 

Yildiz, bal kişand ser daxuyaniya Wezîrê Karên Navxweyî Suleyman Soylû ya der barê Dayikên Şemiyê jî û got: "Gotiye hin kesan em bi kar anîne. Kesî em bi kar neanîne. Em bi hêza dilê xwe, bi êşa zarokên xwe li hev dicivin. Ji bo cihê xwe saxlem bike tiştên wisa dibêje. Em ê bi gotina wî  xwe nedin qeraxê. Herkes li gor xwe tev digere. Ew jî li gor xwe. Dê ew nikaribe me ji doza me dûr bixîne. Em mafdar in. Eger ji kesî fedî nake, bila ji min fedî bike. 23 sal berê min kurê xwe bir qereqolê. Û eger 23 sal ez li kurê xwe digerim, nexwe mafdar im." 

 

‘AGIRÊ DI DILÊ ME DE NE POLÎS NE JÎ GAZAN NAS DIKE' 

 

Yildiz, destnîşan kir ku kî li ber Erdogan serê xwe netewîne, Erdogan wan wekî terorîst îlan dike û got: "Herkes li mafê xwe digere. Eger lêgerîna ji bo edaletê terorîstî be, nexwe ez terorîst im. Nikarin bi zorî û şidetê serî bi me bidin tewandin. Hêza dewletê, polîs û gaza wê heye. Lê agirê di dilê me de jî ne polîs, ne gaz û ne jî hêza wan nas dike. Ji ber agirê di dilê me de em li Qada Galatasarayê." 

 

Hanim Tosûn, hevjîna Fehîm Tosûnê ku di sala 1995'an de li Avcilarê li ber mala xwe hat binçavkirin û paşê hat windakirin, jî bi bîr xist ku 7 sal berê ew jî tev li civîna li Dolmabahçeyê bûye û got: "Kesên wê rojê gazî me kirin û gotin em ê windayên we bibînin, niha bi wehşetî bi ser me de tên. 700 hefte ye em li Qada Galatasaryê rûdinên. Me kesî nerihet nekir, me heqaret li kesî nekir. Me zirar nedaye mal û canê kesî. Tevî evqas êşê, êşa me girnatir dikin. Em bertek nîşan didin, çimkî canê me winda ye. Eger malbatên wan hebûna, dê ev tişt nekirina. Em dayik in. Di hefteya cejnê de ev yek li me kirin. Ma qey wijdan bi wan re tune ye? Ma yek ji wan jî neçûn ser gorên xizmên xwe? Eger gora me hebûûna em nediçûn wir. Ji bo çi evqas neheqiyê li me dikin? Şîna me didome. Em mecbûr in xwedî li Galatasarayê derkevin." 

 

MA / Melike Ceyhan - Servet Karaduman