STENBOL - Endamê Komîteya Amadekar a 1'ê Îlonê Roja Aştiyê ya Cîhanê Yûsûf Gulen, bilêv kir ku şer ne qeder e û avakirina civakeke aştiyane di dest mirovan de ye û got: "Ji bo li hemberî şer aştî bi ser bikeve, di 2'yê Îlonê de li Qada Azadiyê ya Bakirkoyê em li benda herkesî ne."
Dê îsal li Stenbolê mîtînga 1'ê Îlonê Roja Aştiyê ya Cîhanê di 2'yê Îlonê de li Qada Azadiyê ya Bakirkoyê bê lidarxistin. Endamê Komîteya Amadekar a 1'ê Îlonê Roja Aştiyê ya Cîhanê Yûsûf Gulen, diyar kir ku şer li her deverê cîhanê belav bûye û got: "Erdnîgariya Rojhilata Navîn, qada sereke ya krîz û pevçûnên xwîniyî ye. Kedkarên Tirkiyeyê jî wekî hemû gelên Rojhilata Navîn bi vê zalimtiyê re rû bi rû dimîne." Gulen, bang li herkesî kir ku di 2'yê Îlonê de li Qada Azadiyê ya Bakirkoyê bin.
Gulen, diyar kir ku di çaryeka ewil a sedsala 21'ê de Tirkiye hem di warê civakî hem jî di warê dewletê de bi cînarên xwe re hem di nav şer de ye. Gulen, destnîşan kir ku buçeya îsal herî zêde ji bo şer hatiye veqetandin û got: "Ev tê wateya ku dê ev şer, krîza aborî girantir bibe."
‘AVAKIRINA CIVAKEKE AZAD DI DEST ME DE YE'
Gulen, destnîşan kir ku fatûreya şer li kedkar û gelên xizan tê birîn û got: "Em wekî kesên ku dibînin cîhana me, herêma me û welatê me ber bi karesatan ve diçe dibêjin; civak, welat û cîhaneke bê kedxwarî ne xeyal e. Bi beşdarbûn û vîna gel peydakirina demokrasî û edaletê pêkan e. Bêyî ciyawaziya ziman, nîjad û rengan jiyaneke wekhev, bi xwişk û biratî, aştî û azadî pêkan e. Şer, kuştin, çanda kuştinê ne qeder e. Avakirina civak û cîhaneke azad û mirovane di dest me de ye. Mafê me ye ku em doza cîhaneke wisa bikin. Çimkî em bi milyonan e, bi milyara ne, em li her deverên cîhanê ne."
Gulen ji bo mîtîngê bang li herkesî kir û got: "Eger kedkar, karker, jin, hemû gelên bindest ên cîhanê, bi awayekî piştevaniyî li hemberî şer bi awayekî aştiyane hêza xwe û çalakiyên xwe bikin yek dikarin vê rastiyê biguherînin. Loma em di 2'yê Îlonê de li Qada Azadiyê ya Bakrikoyê li benda herkesî ne."
MA / Muhammet Dogru