ÎZMÎR – Şaxa ÎHD’ê ya Îzmîrê û xizmên windayan di çalakiya hefteya 445’emîn de bertek nîşanî mudaxeleya li dijî çalakiya Dayikên Şemiyê ya hefteya 700’emîn dan. Malbatan pişt re qurnefîl avêtin deryayê. 

 

Şaxa Komeleya Mafê Mirovan (ÎHD) a Îzmîrê û xizmên windayan di hefteya 445’emîn de çalakiya “Bila winda bên dîtin û kiryar bên darizandin” li ber Avahiya Serokwezîriyê ya li navçeya Konakê li dar xistin. Xizmên windayan, endam û rêveberên ÎHD, Parlamenterê HDP’ê yê Îzmîrê Murat Çepnî, rêveberên HDP, CHP, Dayikên Aştiyê, nûnerên saziyên civakî yên sivîl û gellek kes beşdarî çalakiyê bûn. Di çalakiyê de pankarta “700 hefteye li te digerim tu li ku yî” hat vekirin û piştevaniyê dan çalakiya Dayikên Şemiyê ya hefteya 700’emîn û mudaxeleya li dijî çalakiyê şermezar kirin. Rêveberê ÎHD’ê Ahmet Çîçek daxuyanî da. 

 

Çîçek bertek nîşanî mudaxeleya li dijî çalakiya Dayikên Şemiyê ya hefteya 700’emîn a li Stenbolê da û êrîşê şermezar kir. Çîçek pirsa “700 hefteye bang dikin, ên qêrîna wan dibihîzin hene?” kir û çalakiya wîjdan û bîra mirovahiyê 23 sal berê li Qada Galatasarayê dest pê kir û hiqûqa di bin banê destilatdariya niha de kiryaran vedişêre û li pêşiya hesab pirsînê dibe asteng. Çîçek anî ziman ku ya tê xwestin tune bikin bîr û wîjdanê mirovahiyê ye. 

 

ÇEPNÎ: EM Ê LI AQÛBETA WAN BIPIRSIN 

 

Piştî daxuyaniyê Parlamenterê HDP’ê yê Îzmîrê Murat Çepnî jî destnîşan kir ku 700 hefteye tevî hemûa stengî û êrîşan Dayikên Şemiyê destanek bêhempa dinivîsînin û tevî hemû êrîş û astengiyan jî dê li aqûbeta windayan bipirsin. 

 

DAYIKA AŞTIYÊ: BILA DAYIK NEGIRÎN 

 

Endama Meclîsa Dayikên Aştiyê ya Îzmîrê Perîhan Kortak jî axivî û diyar kir ku bi salan e di bin zilmê de herikîna xwînê dewam dike û xwest bila êdî dayikên gerilla, leşker û polîsan negirîn. 

 

Xwişka Hasan Ocak ê hat windakirin jî Husniye Ocak jî daxwaz kir ku bila winda bên dîtin û xwest ên li Qada Galatasarayê hatin binçavkirin demildest bên berdan. 

 

Piştî axaftinan 5 deqîqe çalakiya rûniştinê pêk hat.

 

Piştî çalakiyê xizmên windayan çûn qeraxê deryayê ya li Konak Pîer û qurnefilan avêtin deryayê.