AMED – Xizmên windayan ên li Amedê çalakiya hefteya 700’emîn a Dayikên Şemiyê ya li Qada Galatasarayê silav kirin û bi lêdana çepikan mudxeleya li dijî çalakiyê şermezar kirin. 

 

Şaxa Komeleya Mafê Mirovan (ÎHD) a Amedê û xizmên windayan di hefteya 498’emîn de çalakiya xwe ya “Bila winda bên dîtin û kiryar bên darizandin” li ber Peykerê Mafê Jiyanê ya li Parka Koşuyolu li dar xistin. Hevserokê Kongreya Civaka Demokratîk (KCD) Berdan Ozturk, Parlamenterên HDP’ê Dersim Dag, Remziye Tosun, Adnan Selçuk Mizrakli, Semra Guzel, Pero Dundar, Ayşe Acar Başaran, Meral Daniş Beştaş, Hevserokên HDP’ê û DBP’ê yên bajar û navçeyan ên Amedê, Dayikên Aştiyê, aktîvîstên TJA’yê, nûnerên saziyên civakî û gellek kes beşdarî çalakiyê bûn. Wêneyên windayan hatin hildan û raxistin. 

 

Di kêliya Serokê Şaxa ÎHD’ê ya Amedê Parêzer Abdullah Zeytun diaxivî û bal kişand ser mudaxeleya li dijî çalakiya Dayikên Şemiyê ya hefteya 700’emîn, girseyê hemû li çepikan da hem çalakiya Dayikên Şemiyê silav kirin û hem jî mudaxeleyê şermezar kirin. 

 

‘MUDAXELE PARASTINA KIRYARAN E’ 

 

Zeytun diyar kir ku ew bi tundî mudaxeleya li dijî çalakiya Dayikên Şemiyê şermezar dikin û ew ê heta dawiyê li gel dayikan bin û hefteya wan a 700’emîn silav dikin. Zeytun bal kişand ser têkoşîn Dayikên Şemiyê û xizmên windayan û got: “Windakirin polîtîkeyek dewletê ye. Her tim kiryarên bi hezaran mirov revandin û winda kirin, tên parastin. Mudaxeleya li Stenbolê ya li dijî Dayikên Şemiyê jî tê wateya parastina kiryaran.” 

 

‘HÛN JÎ ŞÎRÎKÊ VÎ SÛCÎ NE’

 

Piştî Zeytun, Hevserokê KCD’ê Berdan Ozturk axivî û wiha got: “Dîroka kurd û Kurdistan her tim bi komkujiyan tije ye. Dewleta tirk li çar parçeyan qetlîama xwe dewam dike. Dema komkujiyan dike aqûbeta yên windakirî jî vedişêre. Di tu dîrokê de û li tu deverê tiştek wiha nehatiye dîtin. Têra dilê xwe komkujiayn dikin, paşê jî qala mafê mirovan û demorkasiyê dikin. Ka mafê mirovan û demokrasî li ku ye. Heman desthilatdarî li ser kar e. Êrîşî dayikan dikin. Li şûn ku hûn bersiva dayikan bidin, hûn êrîş dikin. Hûnê hesab bidin heke hûn hesab nedin hûn jî şîrîkî vî karî ne. Em we ji Cizîr, Nisêbîn û Sûrê nas dikin. Çi dibe bila bibe wê rojek hesab bidin. Em li vir soza dûbarekirina piştevaniya têkoşîna li cem dayikan didin.” 

 

ÇÎROKA AHMET ŞEN HAT XWENDIN 

 

Piştî axaftinan Endamê Komîsyona Windayan a Şaxa ÎHD’ê ya Amedê Hasan Yalçin mudaxeleya li dijî çalakiya Dayikên Şemiyê şermezar kir û dû re çîroka windakirina Ahmet Şen ê di 1994’an de li navçeya Basa ya Şirnexê hat windakirin xwend û behsa lêgerîna malbatê û têkoşîna hiqûqî kir. 

 

Piştî axaftinan xizmên windayan 5 deqîqe çalakiya rûniştinê li dar xistin.