STENBOL – Mudaxeleya li dijî xizmên windayan didome. Polîsan mudaxeleyî koma Hevseroka Giştî ya HDP’ê Pervîn Buldan jî di nav de bû kirin. Buldan got: “Welatek ji qêrîna bêdeng a dayikan ditirse hat afirandin. Îro ez bi tenê jî bimînim ez ê li wê qadê rûnêm.”
Dayikên Şemiyê wek her hefteyê bi boneya li aqûbeta windayan bipirsin û kiryar bên darizandin xwestin li Qada Galatasarayê di hefteya 700’emîn de çalakiya xwe li dar bixin. Lê polîsan gaza îsotê û guleyên plastîk mudaxeleyî çalakiya dayikan kir. Gelek kesên li derdorê disekinî ji aliyê polîsan ve hatin derbkirin û binçavkirin. Balkêş bû di dema mudaxeleyê de polîsan got “Hûn xayînên welat in.” Ji ber mudaxeleya dijwar gellek kes ji ser hişê xwe çûn.
ROJNAMEGER DI BINÇAVAN DE NE
Endamên Şaxa ÎHD’ê ya Stenbolê, Midûrê Karê Nivîsan a Rojnameya Yenî Yaşamê Osman Akin, birayê Hayrettîn Eren ê di 12’ê Îlonê de hat windakirin Serokê Giştî yê Basin-Îşê ya girêdayî DÎSK’ê Farûk Eren û gellek kesên di nav de hatin binçavkirin.
GULEYÊN PLASTÎK BERÊ WEKÎLAN JÎ DAN
Girseya Hevseroka Giştî ya HDP’ê Pervîn Buldan jî di nav de bi biryardarî xwestin li Meydanê kom bibin, polîsan gelek caran mudaxele kir. Hat dîtin ku polîsan bi guleyên plastîk êrîşî parlamenterên HDP’ê û CHP’ê yên li ber TOMA’yê sekinibûn kir.
'EZ BI TENÊ JÎ BIMÎNIM EZ Ê LI WÊ QADÊ RÛNÊM’
Piştî mudaxeleyê Hevseroka Giştî ya HDP’ê ku di heman demê de Dayika Şemiyê ye Buldan daxuyanî da û wiha bertek nîşanî mudaxeleyê da: "Welatek ji qêrîna bêdeng a dayikan ditirse hat afirandin. Bê ehlaqiyek wiha mezin nabe. Ev 700 hefteye em li hestiyên zarokên xwe digerin. Heta hestiyên zarokên me bên dîtin em ê têkoşîna xwe bidomînin. Îro ez bi tenê jî bimînim ez ê li wê qadê rûnêm.”
‘EV DINYA BI DOR E’
Parlamenterê HDP’ê Amedê Garo Paylan jî bi polîsan re nîqaş kir. Amirek polîsan ji Paylan re got “Tişta pêwîst çi be wê polîsên min pêk bînin.” Paylan jî wiha bersiva amirê polîsan da: “Ev dinya bi dor e.”
LI ÎSTÎKLALÊ STRANA ‘MIN BIBÎNE DAYÊ’ HAT GUHDARKIRIN
Polîsan xwest bikevin hundirê avahiya Rêxistina CHP’ê ya navçeya Stenbolê. Di kêliya girse li hev kom bû, li hin kafeyan strana “Benî Bul Anne (Min bibîne dayê)” hat guhdarkirin û guhdarkirina stranê didome. Qada Galatasarayê bi vê stranê deng vedide.
TEVÎ MUDAXELEYÊ JÎ RÛNIŞTIN
Hin xizmên windayan li ber Kargeha Odakule ya li Kolana Îstîklalê çalakiya rûniştinê li dar xist. Xizmên windayan demek li vir rûniştin û polîsan bi gaza îsotê mudaxeleyî xizmên windayan kirin.
Girse bi berzkirina dirûşmeya “Ev hêj destpêkê têkoşîn dewam dike” û bi lêdana çepikan sekna xwe berdewam dike.