NAVENDA NÛÇEYAN - Saziya Malbatên Endamên QSD`ê ku li herêma Serêkaniyê di 6'ê tebaxê de hat avakirin, armanca dike ku bibe pira têkiliyên di navbera endam, malbat û rêveberiya leşkerî.
Saziya Malbatên Endamên QSD`ê di 6’ê Tebaxê de hat avakirin. Armanca saziyê ew e ku bibe pira têkiliyên di navbera malbatên endaman, endam û rêveberiya leşkerî. Rêveberiya saziyê mal bi mal diçin serdana endamên hêzên girêdayî QSD (YPG/YPJ, Disiplina Leşkerî, Erkê Xweparastinê) dikin û li malbatan guhdar dikin. Endamê Rêveberiya Malbatên Endamên QSD’ê Hecî Seyfedin, der barê armanca avakirina saziyê de ji Ajansa Nuçeyan a Hawarê (ANHA) re axivî. Hecî diyar kir ku armanca avakirina vê saziyê ew e ku malbatên endamên xwe nas bikin, malbat jî rêveberiya endamên xwe nas bikin û wiha got: “Ji bo pêwîstiyên malbatan, xwestekên malbatan, rewşa leşkeran SME saziyek giringe. Malbat jî ji bo rewşa zarokên xwe serdana me dikin. Dema endamên me cih digûherin, yan jî tevlî şer dibin gelek caran malbat ji rewşa wan bê xeberin. Malbat jî dikarin serdana me bikin ji bo agahiyên zarokên xwe. Yan jî gelek car jî di malbatê de pirsgirêkên endaman çêdibin, em bi malbat û endaman re nîqaş dikin û pirsgirêkên endaman li gel malbatê çareser dikin.”
Hecî da zanîn ku malbat wan pir germ û kêfxweş pêşwazî dikin û wiha got: “Malbatan diyar kirin ku em dereng mane. Lê ji ber şer û rewşa ku heyî niha derfetê me çêbû ku em bibin bersiva pirsgirêk û daxwazên malbatên endamên xwe.”
Şervanê QSD`ê Fedekar Dirbêsiyê jî der barê avakirina saziyê de nerîna xwe anî ziman û wiha got: “Vê saziyê rihetiyek xist dilê malbatên me. Êdî rêveberiya me nas dikin, dema kêmasiyek derdikeve yekser bi rêveberiya me re dikevin nava têkiliyan.”
Şervana QSD’ê Berçem Azadî jî da zanîn ku dema ew diçû şer, yan jî karek din derdiket malbata wê ji wê bê xeber bû, niha ev sazî dê agahiyan bide malbata wê û wiha axivî: “Malbat bi vê saziyê pir kêfxweş bûn. Cihek heye ku serdan bikin. Destpêkê malbat sazî bi sazî digeriyan, niha muxatabê wan heye.”
'EM JI SERDANA MALBATAN MORAL DIGIRIN'
Dayîka Masîro yê di şer de jiyana xwe ji dest da Zehra Qido ya ku hevjînê wê jî şervanê YPG’ê ye kêfxweşiya xwe ya ji bo avakirina saziyê bi van gotinan vegot: “Bi taybet dayîk pir kêfxweş in. Her dayîkek çavê wî li riya zarokê xwe ye. Her çend zarokên me ji me durbin jî dema hevalên wan tên malê û rewşa me dipirsin, wekî ku zarokên me hatine malê em kêfxweş dibin. Em pirsa zarokên xwe dikin, rewşa wan fêrdibin. Ne ez tenê her malbatek bi vê saziyê kêfxweş e. Malbat çaverêyên rêveberiya saziyê ne, da ku serdana wan jî bikin, bi vê yekê moralên wan jî baş dibe.”