STENBOL – Dayikên Şemiyê di 25'ê Tebaxê de li Qada Galatasarayê dê çalakiya 700'emîn pêk bînin. Hevseroka Giştî ya HDP'ê Pervîn Bûldan, bang li her kesî kir ku tev li Dayikên Şemiyê bibin û got: "Qîrîna dayikan qirîna me hemûyan e."
Dayikên Şemiyê li Qada Galatasarayê heta niha 699 cakan kom bûn û çalaki pêk anîn. Şemiya 25'ê Tebaxê dê di hefteya 700'î de li hev kom bibin. Li Tirkiye di salên 1990'an de piştî bi hezaran welatiyên kurd ji aliyê JÎTEM, cerdevan, leşker û polîsan ve di bin çavan de hatin windakirin û kuştin û hêj cenazeyê hezaran nediyar e, Dayikên Şemiyê li Stenbolê rojên Şemiyê dest bi çalakiyên rûniştinê kirin. Dayikên Şemiyê di sala 1995'an de bi armanca bala rayedarên dewletê û medya bikişînin û bêdengiyê rexne bikin li Qada Galatasarayê ya Taksimê dest bi çalakiyên Şemiyê kirin. Xizmên windayan ku ji çalakiyên Dayikên Las Madres de Plaza de Mayo mînak girtin, bi rêk û pêk li Qada Galatasarayê dest bi çalakiyê kirin û didomînin. Dayikên Şemiyê tevî hemû zext û zordariyan 700 hefteye bê navber bi rêk û pêk çalakiyên xwe berdewam dikin û li aqûbeta windayan digerin.
Hevseroka Giştî ya Partiya Demokratîk a Gelan (HDP) Pervin Buldan, bang li her kesî kirin ku tevli çalakiya Dayikên Şemiyê ku her hefte roja Şemiyê li Qada Galatasarayê kom dibin û aqûbeta windayan dipirsin, bibin û dayikan tenê nehêlin.
‘QADA GALATASARAYÊ JI BO DAYIKAN CIHEKÎ GIRÎNG E'
Pervûn Buldan ku ew jî di heman demê de Dayika Şemiyê ye, diyar kir ku Qada Galatasarayê ji bo dayikan cih û kozikek taybet e û wiha got: "Bi salan e dayikên zarokên wan di bin çavan de hatin windakirin û kuştin, hêj hesap ji kujerê wan nehatiye pirsîn. Hêj kujerê wan nehatine ronîkirin. Bi salan e dayik li pêş Lîseya Galatasarayê li aqûbeta windayan û edaletê digerin. Mirov li vir tenê ji bo bigêjin hestiyên zarokên xwe bi salan e çalakiya rûniştinê pêk tînin. Dayik dê vê hefteyê çalakiya 700’î pêk bînin. Em ji bo li Tirkiye winda bên dîtin û hesap ji kujeran bê pirsîn, divê teqez dengê xwe tev li dengê wan bikin. Divê teqez em bibin hevkarê hest û dengê wan."
‘QÎRÎNA DAYIKÊN ŞEMIYÊ QÎRÎNA ME TEVAN E'
Buldan, anî ziman ku êdî edalet û hiqûq li Tirkiye nemaye û xwest her kes ji bo edalet û hiqûqê qîrîna xwe bilind bikin. Buldan wiha got: "Ji ber vê yekê qîrîna dayikek şemiyê qîrîna me tevan e. Ez wekî Dayikek Şemiyê û xizmên windayan, ez dê deng bidin dengê dayikan. Ez dê tevî dayikan rûnêm. Tev li çalika dayikan bibim. Pêdiviya Tirkiye ji edalet û hiqûqê heye. Pêdivî ji aştî, birati û azadiyê heye. Ji bo kujer bên darizandin û winda bên dîtin divê her kes tev li vê çalakiyê bibe û tev li qîrîna dayikan bibin. Em di hefteya 700’î de hemû bi hevre li Qadê bin."
MA / Necla Demir