ÊLIH – Mehmet Alcû û hevjîna wî Hemê Alcû ku li gundê xwe yê di dema operasyonên leşkerî û çewisandinan de hat valakirin dimînin, ji bo rêya gund bê çêkirin serî li Walîtiya Êlihê dabûn, lê walîtî bi hinceta "li gund du kes dijîn' serlêdana wan qebûl nake.
Operasyonên leşkerî û çewisandinên herêmê bandor li gundê êzdiyan Cinêra yê Êlihê jî kir. 30 mal li gund diman, lê belê her ku çû hejmar kêmtir bû û ji ber çewisandinan malbat di salên 2000'î de koçî Ewropayê kirin, lê belê li gund tenê malbata Alcû ma. Piştî 2000'î hin welatî tenê salê çend mehan tên gund û zarokên malbata Alcû jî salê çend mehan serdana dê û bavê xwe dikin.
Li gundê Cinêra ji bilî Mehmet Alcû (78) û hevjîna wî Hemê Alcû (77) kes najî. Li ser gundê 21 hilbijêr qeydkirî ne, lê belê ji vana 19 jê li derveyî welat in û dema di hilbijartinê de sindoq tê danîn tenê du kes deng xwe bi kar tînin.
RÊYA GUND NEHAT ÇÊKIRIN
Her wiha Mehmet Alcû 17 sal in keyayê gund e. 10 sal in rêya gund ku 4 kîlometre ye nayê çêkirin û Alcû ji bo vê li ber xwe dide. Alcû ji bo vê yekê gelek caran serî li Walîtiya Êlihê daye, lê belê walîtî bi hinceta "li gund du kes dijîn" destûra çêkirina rê nade.
‘EV DER WARÊ MIN E'
Alcû, da zanîn ku 17 sal in ew keyayê gund e û got: "Êdî emrê min çû. Dema vê baxçeyî av didim jî gêja min diçe. Hevjîna min li erdê ye, lê dîsa jî naxwazim ji gundê xwe biçim. Ev der warê min e û ez ê li vira bimirim. Em du kes li gund dimînin."
Alcû, diyar kir ku gundê wan perîşan bûye û 10 sal in ji bo rêya gund bê çêkirin li ber xwe dide û got: "Rêya gundê me 3-4 kîlometre ye. Li ser rêya gund tabelaya gundê me jî tune ye. Gele caran çûm walîtiyê û min serî lê da. Tim dibêjin ji bo du kesan rêya gund nayê çêkirin. 10 sal in doza çêkirina rêya gundê xwe dikim."
DÊ DÎSA BIBE NAMZET
Alcû, diyar kir ku ji bo çêkirina rêya gund rojek tenê bes e û ew ê di hilbijartina herêmî de dîsa ji bo keyatiyê bibe namzet. Alcû got: "Keyayê vî gundî ez im û li gund kes tune ye. Ez ê dîsa bibim keya. Ji bo çêkirina rê ez ê li ber xwe bidim."
MA / Metin Yoksu