Ji 27'ê Gulana 1995'an ve Dayikên Şemiyê tam 700 hefte ye li Qada Galatasarayê li xizmên xwe yên winda digerin. Niha di nav Dayikên Şemiyê de ya herî temendirêj Elmas Eren e ku kurê wê Hayrettîn Eren (26) piştî darbeya 12'ê Îlonê di 21'ê Mijdara 1980'yî de hat binçavkirin û windakirin. Lê belê di end salên dawî de Erena 85 salî ji ber rewşa xwe ya tenduristiyê nikare bê Qada Galatasarayê, lê belê her hefte telefonî keça xwe Îkbal Eren dike û dibêje: "Ev hefte çawa derbas bû? Kî hat bibîranîn? Kî hatibûn?" 

 

‘BI KESÎ RE XEBER NEDIDA' 

 

Dayik Eren, ji roja ku çalakiyên Dayikên Şemiyê dest pê kirin ew tev li wan bû û ji bo biçe Qada Galatasarayê xesûya xwe ya felcî datanî cem xizmên xwe û berê xwe dida qadê. Keç Îkbal Eren, bilêv kir ku her ku dayiak Eren tê Qada Galatasarayê pir li ber dikeve û got: "Piştî ji Qada Galatasarayê dihat bi kesî re xeber nedida, diçû odeya xwe." 

 

Îkbal Eren, bilêv kir ku dayik Eren dayikeke hêzdar e û got: "Hevalên kekê min dihatin mala me. Li cem wan qet nedigiriya. Di nava xwe de digiriya. Tim êşa wê di nava wê de bû. Nedixwest kes li ber bikeve. Lê tu carî dev ji lêgerîna wî berneda. Bêyî ku hayê me jê hebe diçû Midûryeta Emniyetê." 

 

‘HIN TIŞT NEHATIN JIBÎRKIRIN' 

 

Eren, bilêv kir ku ji ber tenduristiya wê dayik Eren hin tiştan tev li hev dike, lê belê hin tişt hene hîn jî ji bîra wê neçûne. Keç Eren got: "Dema xwarineke ku kekê min jê hez dikir çêdikir gazî me dikir. Dema kesekî dişiya bwî bidîtana digot. Çend sal berê nûçeyeke ku '38 sal in hin kesên kesekî wan tune ye û di girtîgehê de ne hene' xwendibû. Gotibû 'min nûçeyeke bi vî rengî dîtiye were em biçin.' her çend dem derbas bûbe jî, lê bêhêvî nebûye. Hin tişt hene qet nayên jibîrkirin." 

 

‘DEMA HEFTEYEKÊ NEYÊM XEW BI ÇAVÊ MIN NAKEVE' 

 

Îkbal Eren jî diyar kir ku ew ji sala 1995'an ve tê Qada Galatasarayê û dema hefteyekê neçe xew bi çavên wê nakeve. Eren got: "Dema hefteyekê neçim xew bi çavê min nakeve. Qada Galatsarayê bû cihê goristana me. Em şîna xwe li wir girêdidin." Eren, bilêv kir ku kêliyekê jî kekê wê ji bîra wê naçe û got: "Em qet hîn nebûn. Eynê weke roja berê em diêşin." 

 

‘EM TIM BI HÊVÎ NE' 

 

Eren, destnîşan kir ku ji roja ku kekê wê hatiye windakirin jiyana wan bi temamî guheriye û tim di nav lêgerînekê de ne. Eren got: "Qebûlkirinek heye. Dema qezayek çêbibe an jî bimire, cenaze radestî malbatan dikin. Dewletê sûc kir, lê em dibêjin di dest me de tiştekî şênber heye. Eger di dest we de tiştekî şênber tune be, nexwe ew tê wateya ku hîn ew kes heye. Loma li her derî tu li wî digerî. Li cihekî dema kesek dibêje polîs, di wê kêliyê de tu dixwazî dest têxî stuyê wî. Hêvî tim heye." 

 

Eren, destnîşan kir ku ew ê tu carî dev ji têkoşînê bernedin û hewcetî bi têkoşîneke hevpar heye. Eren got: "Eger kes naxwaze bibe malbateke windayan, nexwe divê werin Qada Galatasarayê." 

 

MA / Melike Ceyhan