Kongreya Civaka Demokratîk (KCD), bi daxuyaniyek nivîskî êrîşa hewayî ya li ser Şengalê pêk hat bi tundî şermezar kir. KCD'ê di daxuyaniyê de anî ziman ku dewleta Tirk di serî de li ser gelê Kurd û bi giştî li ser hemû gelên li ber xwe didin şerê qirêj dide meşandin û bi vê re her roj komkujiyekê li ser komkujiyên xwe zêde dike. KCD'ê da zanîn ku Erdogan û desthilatdariya wî li ber çavên hemû dinyayê tu pîvanên hiqûqa gerdûnî û nirxên mirovahiyê nas nake û bi ser gelan de bombe dibarîne. 

 

KCD'ê destnîşan kir ku Balafirên şer ên TSK’ê di 15’ê Tebaxa 2018’an de seat di 16.00’an de li hemberî yek cihê pîroz ê Şengalê êrîş kir û komkujî pêk anî û wiha got: "Yên ku di vê komkujiya di salvegera komkujiya Koço de jiyana xwe ji dest dane bi rêzdarî bi bîr tînin û ji malbatên wan û gelê Kurd re sersaxiyê dixwazin.  Yên di vê êrîşê de birîndar bûne re şîfayê dixwazin. Wekî tê zanîn di 3’yê Tebaxa 2014’an de dema DAIŞ êrîşî Şengalê kir komkujiya herî hovane û dermirovahî li gundê Koço pêk anîbû û gelek mirovên me yê Êzidî li wir qetil kiribûn. Erdogan û desthilatdariya AKP-MHP’ê duh bi ser gelê me yê Êzidî de bombe barandin û komkujiyeke din pêk anî. Ev komkujî ne tenê li hemberî gelê me yê Êzidî pêk hatiye. Ev komkujî li hemberî hemû gelên Kurdistanê û mirovahiyê pêk hatiye. Bi vê komkujiyê re careke din hevkariya Erdogan û desthilatadariya wî AKP-MHP bi DAIŞ’ê re derket holê." 

 

'EM VAN ÊRÎŞAN QEBÛL NAKIN' 

 

KCD'ê herî dawî komkujî şermezar kir û got: "Em wekî Kongreya Civaka Demokratîk diyar dikin ku em van êrîşên li ser gelê me yê Êzidî tên meşandin qebûl nakin. Em yên ev êrîş pêk anîne, bersûc û hevkarên wê bi tundî şermezar dikin. Em bang li gelê kurd û hemû beşên sosyalîst û şoreşger dikin ku bi gelê me yê Êzidî re di nava tevkariyê debin û têkoşîna xwe bilindtir bikin." 

 

 

TJA: QIRKIRINA LI DIJÎ KURD Û ÊZIDIYAN DIDOME' 

 

Di daxuyaniya TJA’yê de hat gotin desthilatdariya AKP-MHP dixwaze qirkirina li dijî kurd û ezidiyan a di şertê Şerê 3’yemîn ê Cîhanê li Şengalê temam bike û wiha hat gotin: “Di serî de Tirkiye û hemû dewletê paşverû yên herêmê, ku hêzên emperyalîst û hevkarên DAIŞ’ê destek dikirin bi parastin û berxwedana jinê wan li Şengalê têk birin. Li dijî têkoşîna azadî û demokrasiyê ya kurd û ezidiyan naxwazin pêk were. 

 

‘ÇAVÊN XWE JI ÊRÎŞAN RE DIGIRIN’ 

 

Piştî pêşmergiyan dest ji Şengalê berda û reviya DAIŞ’ê di 3’ê tebaxa 2014’an de êrîşî axa Şengalê kir û tevkujiyê pêk anî. 400 hezar êzidî bi darê zorê ji warê xwe hatin koçberkirin. Nêzî 7 hezar jin û zarokên êzidî wek xenîmet dîl hatin girtin û tecawizî wan hat kirin. Hêj sê hezar û nîv jin û zarokên êzidî di destê DAIŞ’ê de dîl girtîne. Jin û zarokên êzidî di komkujiyê de hatin derbaskirin. Hêzên navnetewî çavê xwe li dijî van êrîşan girt û ji nedîtî ve hat. 

 

‘ARMANCA ÊRÎŞÎ TEVKUJIYE’ 

 

Roja 15’ê Tebaxa 2018’an balafirên şer ê Tirk axa Şengalê bomberbaran kir û gelê silîv kiriye hedef. Bi vê êrîşê re jî hat nîşandan komkujiya li dijî kurd û êzidiyan didome. Divê desthilata AKP-MHP û hezên hevkarên wan baş dizanibin, em li cem têkoşîna azadiya jinên Şengalê û gelê wê cih bigirin. Hêzên mêtinger û dagirker wê bi berxwedana jinan û gel têk biçin. Êrîşa duh li dijî rêveberiya civaka êzidî pêk hat, armanca êrîşî tevkujiye. Em êrîşa li dijî endamê Kordînasyona Civaka Êzidî Mam Zekî Şengalî yê ji bîranîna welatiyên di komkujiya gundê Koço yên di êrîşa DAIŞ’ê de jiyana xwe ji dest vedigeriya şermezar dikin. Em carek din jî diyar dikin ku em li cem civaka êzidî ne û em bang li hemû dînamîkên demokratîk, sazî, dezgeh û gelê xwe dikin bêdeng nemînin û têkoşînê bikin.”