Ji ber ku Wezareta Perwerdehiyê ya Milî her tim di pergala perwerdehiyê de guhertinan dike, senketina xwendekaran jî her ku diçe zêde dibe. Her wiha di ezmûnên bicihkirina zanîngehan de jî ciwan tên mexdûrkirin. Îsal 2 milyon 381 hezar û 590 namzet serî li Testa Têrkirina Bingehîn (TYT), 2 milyon 19 hezar û 664 namzet serî li Testa Têrkirina Qadê (AYT) û 131 hezar û 448 namzet jî serî li Testa Zimanê Biyanî (YDT) dan. Hema bêje ji ber guhertina pergala perwerdehiyê û ezmûnan xwendekar di van ezmûnan de bi ser neketin.

 

Endamê Kordînasyona Rêxistinkirina Şaxa Jimara 1’an a Egîtîm Senê ya Amedê Zulkuf Guneş serneketina xwendekaran a di ezmûnan de nirxand û got: “Sedema xwendekar di ezmûnan de bi sernakevin, ji ber ku pergala perwerdehiyê ne azad, laîk û hemdem e.” 

 

'LI GORÎ SERDEMÊ PERWERDE NAYÊ DAYÎN’ 

 

Guneş anî ziman ku ji roja AKP bûye desthilat û heta roja îro her tim pergala perwerdehiyê diguherîne û wiha got: “Ji zanistê dûr in. Dogmayên oldarî li mifredata pergala perwerdehiyê de zêde kirin e. Piştî vê yekê li mifredatan zêde kirin, her ku çû serkeftina ezmûnan kêm bû. Li gel şertên serdemê jî di pergala perwerdehiyê de paşketin heye. Li welatên Ewropa û pêşketî li ser fezayê xebatê birêve dibin, lê em hêj pergala perwerdehiyê nîqaş dikin.” 

 

‘EM DI RÊZÊN DAWÎ DE NE’ 

 

Guneş destnîşan kir ku divê pergala perwerdehiya li Tirkiyeyê bê azadkirin û wiha dewam kir: “Di ezmûnên li tevahiya cîhanê tên kirin em di rêzên dawî de ne. Divê pergala perwerdehiyê li gorî eleqeya xwendekaran bê amadekirin.”