ŞIRNEX – Danişîna 3’yemîn a doza rojnameger Ziya Ataman jî di nav de 9 kesên jê girtî 19 kesên tên darizandin hat dîtin û kes nehat berdan. Rojnameger Ataman di parastina xwe de got: “Ez wek rojnamegerk tenê çeka min pênûs e. Wek din jî çeka min nîne.”
Danişîna 3’yemîn a doza nûçegihanê Ajansa Nûçeyan a Dîcleyê (DÎHA) a bi Biryarnameya di Hukmê Qanûnê de (KHK) hat girtin Ziya Ataman ê di 11’ê nîsana 2016’an de li Wanê hat girtin û 9 jê girtî bi giştî 19 kesan tên darizandin li 1’emîn Dadgeha Cezayê Giran a Şirnexê hat dîtin. Ataman û yên pê re bi îdiayên “Yekîtiya dewletê û hevpariya welat xerakirin”, “Bi plan peywîrdarê cemaweriyê bi qestî kuştin”, “Bi plan hewldana peywîrdarê cemaweriyê kuştin”, “Bi plangerî hewldana bi qestî kuştin”, “Zerardayîn bi madeyên teqemeniyê yên sazî û dezgehên cemaweriyê û qestî zerar dayîn”, “Muxalefeta li dijî qanûna jimara 6136’an”, “Di çarçoveya xebatên rêxistinekê de madeyên talûke bê destûr li ser xwe gerandin” tên darizandin.
Bersûcên ne girtî tev li danişînê nebûn. Ataman û girtiyên din bi Pergala Deng û Dîmen (SEGBÎS) ji Girtîgeha Ewlehiya Bilind a Wanê tev li danişînê bûn. Xizmên girtiyan û parêzer, ji parêzerên Komeleya Xebatên Medya û Hiqûqî (MLSA) Zelal Pelîn Dogan dozê şopandin.
GIRTÎ: EM MEXDÛRÊ BÛYERÊN QEWIMÎNE
Bi tespîta nasnameyan danişînê destpê kir. Belgeyên danişîna berê hatibûn xwestin negihîştin dadgehê. Serokê dadgehê diyar kir ku ew ê ji bo kêmasiyên dosyeyê temam bibin biryara navberê bide û ji girtiyan tiştek lê zêde bikin an nekin xwest.
Girtiyan sûcên li ser xwe red kirin û ew mexdûrên bûyerên qewimîne. Girtiyan daxwaza berdana xwe kir.
‘DOSYE BI AWAYEK KOMPLOGERÎ HATIYE AMADEKIRIN’
Rojnameger Ziya Ataman jî parastina xwe kir û parastina xwe ya berê dubare kir. Ataman anî ziman ku dosyeya wan bi rêbaza “kopî bike û bizelqîne” hatiye amadekirin û got: “Bêyî îfadeyên me bên girtin îdianameyek wisa hat amadekirin. Ev yek bi serê xwe pirsgirêkek hiqûqî ye. Dema em li dosyeyê dinêrin tê xuyakirin ku dosye bi komployek hatiye amadekirin. Em bi îdianemeyek li gorî hiş û aqilan e re rû bi rû ne.”
Ataman tehdîd û şantaja li dijî rojnamegeran bibîr xist û wiha got: “Bi salan e helwesta li dijî rojnamegerên çapemeniya azad neguheriye. “Ez wek rojnamegerk tenê çeka min pênûs e. Wek din jî çeka min nîne.”
DOZGERIYÊ LÊPIRSÎNA ÎDAYÊN ÎŞKENCEYÊ NEKIRIYE
Pişt re hin parêzeran jî destnîşan kir ku ji şahidên dosyeyê îfadeyên Kadîr Ataman di bin îşkenceyek giran de hatine girtin û îfadeyên berê hatine amadekirin bi darê zorê bi wî dane îmzekirin. Parêzeran got qeydên li nexweşxaneyê jî vê rewşê datîne holê û şebekeyên dosyeyê sexte li hundirê emniyet û leşkeriya Elkê pêk tînin.
Ji parêzeran Yusuf Aslan jî pirs kir ku dozgeriyê têkildarî îdiayên îşkenceyê lêpirsîn destpêkiriye an na.
Pişt re dozger axivî û anî ziman ku wan têkildarî îdiayên îşkenceyê lêpirsîn nedane destpêkirin û xwest hemû daxwazên parêzeran bên redkirin û dewama girtinê xwest.
Heyeta dadgehê piştî parastinan navberek kurt da danişînê û dûre hemû daxwazên parêzeran red kir û biryara dewama girtinê da.
Heyeta dadgehê danişînê taloqî 26’ê cotmeha 2018’an kir.