ÎZMÎR – Gurbet D.'ya ku di 11 saliya xwe de bi kesekî 63 salî re hat zewicandin, niha li Basmaneya Îzmîrê bi çêkirina baxlemayan sebra xwe tîne. Gurbet ji ber êş û azarên ku kişandine ne dibihîse û ne jî dikare biaxive.
Li semta Basmane ya navçeya Konak a Îzmîrê, Gurbet D. xwedî çîrokeke hezîn e. Gurbet D. di 11 saliya xwe de bi zilamekî 63 salî re hatiye zewicandin û niha li cem hosteyê baxlemeyan Huseyîn Ozer dixebite. Gurbet D., dema 11 salî ye bavê wê li zilamekî mar dike. Dema welidandinê dayika Gurbetê dimire û bavê wê jî bi jineke din re dizewice û di 11 saliya wê de bavê wê bi pereyan wê difiroşe zilamekî. Gurbet D. anî ziman ku kesê ku ew pê re hatiye zewicandin zewicandîbû û niha temenê wî di ser 80'yî re ye. Ji ber ku Gurbetê ker û lal e, me pirsên xwe ji hosteyê wê Ozer kirin û hosteyê wê jî bi îşareta destan ji Gurbetê re vegotin.
‘JI BER ADIZÎ Û STRESÊ UR DI MÊJIYÊ MIN DE ÇÊBÛ'
Her ku Gurbetê çîroka xwe vedigot digiriya. Gurbetê, destnîşan kir ku ji ber adizî û stresê ûr di mêjiyê wê de derketiye û wiha behsa tiştên hatine serê wê kirin: "Min qet diya xwe nedît. Piştî ku diya min mir bavê min bi jineke din re zewicî. Dêmariya min ez nexwetim. Xwarin û kinc jî nedidan min. Pir birçî mam. Dema 11 salî bûm bavê min bi pereyan ez firotim zilamekî 63 salî. Min telefonî bavê xwe dikir, digiriyam, lê bêfêde bû. 4 birayên bavê min hene, lê kesekî ji wan jî ez qebûl nekirim. Li vê cîhanê nasekî min jî tune ye. Tu sûcê min tune bû, lê dîsa jî min bi zilamekî ku qet wî nas nedikir re zewicandin. Lê êdî ez jî kesî ji wan naxwazim. Ji ber adizî û stresê ûr di mêjiyê min de çêbû. Zilamê ku pê re hatim zewicandin ez emeliyat kirim. Zilamê ku pê re hatim zewicandin jî hevjîna wî û 10 zarokên wî hene. Malbata wî jî ez diqewirandim, birçî mam."
‘MIN ZAROKÊ XWE DA SAZIYA HÊVIŞANDINÊ'
Gurbet D., bilêv kir ku nemaze jî di cejnan û rojên taybet de xemgîn dibe. Gurbetê, diyar kir ku di van rojan de herkes li cem malbata xwe ye lê ew bi tenê ye û wiha got: "Bavê min carekê hat Îzmîrê. Mirovê ku carekê jî li min negeriya û li halê min nedipirsî hat pere ji min xwest. Di zarokatiya xwe de ducanî bûm. Dema zaroka min çêbû min tiştek nedibihsît û min nikaribû baixive. Li bavê min geriyan gotin wer keça xwe û zaroka wê bibe, lê nehat. Got 'keçeke min a wiha tune ye.' Jimecbûrî min zaroka xwe da saziya hêvişandinê. Niha nizanim li kuderê ye. Min carekê jî ew nedîtiye. Hemû ji ber bavê min wisa bû. Rojekê dîsa birçîbûm û li Basmaneyê digeriyam. Di ber atolyeya baxlemeyan a Huseyîn Ozer re derbas bûm. Nexwe hay ji rewşa min çêbibû û gazî min kir. Ji min xwest ku ez li cem wî bixebitim. 5 salan li cem wî xebitîm. Hînî xêzên ku li ser baxlemeyan tên çêkirin bûm û hînî girêdana têlan bûm. Çêkrina baxlemeyan hînî min kir. Niha baş nikarim çêbikim, lê gelek tişt hîn bûm. Min dixwest bidomînim. Lê ji ber ku ji serê xwe emeliyat bûme, tim diêşe û min jî nikaribû b ike. Ji ber emeliyatê pir nikarim bixebitim. Min meaşê xwe yê astengdariyê çêkir, niha debara xwe pê dikim. Xwarina xwe, kincên xwe dikirim û carinan jî baxlemeyan çêdikim. Dema bi wan re bilî dibim xwe baş hîs dikim. Niha difikirim ka çi sûcê min hebû? Ev tişt anîn serê min. Dema ez zewicandim zarokeke biçûk bûm. Li vê dinyayê kesekî min tune ye. Ez ê tu carî malbata xwe efû nekim."
Gurbetê, destnîşan dike ji ber birçîbûn û tiştên hatine serê wê ker û lal bûye. Gurbetê hîn jî ne dikare biaxive û ne jî bibihîse, lê ji liv û tevgerên lêvên mirovan fêm dike ku çi tê gotin.
MA / Rûken Demir – Nîmet Olmez