ŞENGAL – DAIŞ’ê li Rojhilata Navîn êrîşa herî mezin û dijwar li dijî Şengal pêk anî û bi sedan jinên êzidî li bazarên koletiyê firot. Jinên ji fermana 73’yemîn rizgar bûn behsa qewimînên xwe kirin. 

 

DAIŞ’ê fermana 73’yemîn bi serê civaka êzidî ve anî. Ev ferman 4 sal li pey xwe dihêle. Beriya vê komkujiyê jî warê êzidiyan Şengal 72 caran rastî talan û hilweşandinê hat. Bi piştevaniya hêzên navnetewî û herêmî vê carê Şengal di 3’ê Tebaxa 2014’an de rastî komkujî û talana DAIŞ’ê hat. 

 

DAIŞ’ê li Rojhilata Navîn êrîşa herî mezin li Şengalê pêk anî û bi deh hezaran welatiyên êzidî di qirkirinê de derbas kir. Bi hezaran jinên êzidî dîl girt û li bazarên koletiyê yên Musil, Reqa, Dêra Zor, Telafer, Minbic û Girê Spî firot. Bi hezaran êzidiyan qetil kir. Bi sed hezar êzidî koçberî cihên cuda yên cîhanê kirin.

 

Di berxwedana li dijî DAIŞ’ê de gellek jinên êzidî hatin rizgarkirin. Hêj aqûbeta bi sedan jin ne diyar e û di destê DAIŞ’ê de dîl tên girtin. 

 

Jinên êzidî yên ji destên DAIŞ’ê hatin rizgarkirin der barê qewimînên hatine serê wan de axivîn. 

 

HÊJ 15 SALÎ BÛYE 

 

Yek ji van jinan Bedriye Feysal e û ji gundê Domîz ê Şengalê ye. Feysal dema hat revandin 15 salî ye û niha bûye 18 salî. Dema dikeve destê DAIŞ’ê 15 salî bûye. Roja fermanê xwe diavêje Çiyayê Şengalê û bi bavê xwe û 6 xwişk û birayê xwe re ji aliyê DAIŞ’ê ve dîl tên girtin. Ewil wê dibin Şengalê û pişt re jî dibin Telaferê. Pişt re Feysal dibin girtîgeha Badûşê ya li bakûrrojavayê Musilê û heps dikin. Hepîsxaneya Badûşê tenê wek cihê jinên êzidî lê dihatin komkirin tê zanîn. 

 

Feysal ji bo neyê kuştin misilmaniyê qebûl dike. Piştî wê ji girtîgehê derdixin carek din dibin Telaferê û pişt re wê û xwişka wê ji malbatê vediqetînin û dibin Musilê. Li vir difiroşin emîrek DAIŞ’ê yê bi navê Ebu Tahir. Feysal bi vî awayî difiroşin 6 DAIŞ’yan û herî dawî dibin Reqayê. Dema Hêzên Sûriyeya Demokratîk ên Sûriyeyê (QSD) li Reqayê operasyona rizgarkirinê da destpêkirin, DAIŞ bi dehan welatiyên êzidî dibe Dêra Zorê. Dayik û 4 xwişk û birayên Feysal salek berê tên rizgarkirin. Feysal jî piştî 10 mehan di operasyona QSD’ê ya li Dêra Zorê de tê rizgarkirin. Bav û du xwişk û birayên Feysal di destê DAIŞ’ê de dîl tên girtin. 

 

XALÎDE MURAD

 

Xalîde Murad a zewicandî û 33 saliye ji gundê Tel Kesab a bi ser Koço ve ye. Murad roja fermanê li gel malbata xwe ji bo bigîhîje Xanesorê li nêzî gundê Herdan pêşiya wan tê girtin û dîl tê girtin. Di heman rojê de 226 ferdên eşîra wê ya bi navê Mêrka dîl tên girtin. DAIŞ ji 226 kesan 102 kesan înfaz dike. Aqûbeta yên din nayê zanîn. Murad bi dorê dibin Şengalê, Telaferê û Musilê. Ew jî bi rojan li Girtîgeha Badûşê dîl tê girtin. Murad piştî sê mehan bi piştevaniya kesek ereb ê nasê wê xwe ji destê DAIŞ’ê rizgar dike. Hevjînê Murad hêj di destê DAIŞ’ê de ye. Heta îro tu agahî jê negirtiye. 

 

HURO WEK KOLEYAN DIDIN XEBITANDIN 

 

Huro a 55 salî ya ji gundê Girzer a Şengalê jî dema li gel malbata xwe di riyên fetlonek de gihîşt Şengalê ji aliyê DAIŞ’ê ve dîl hatin girtin. Huro bi hevjîn û 3 kurên xwe re dîl dikeve dest û wê dibin Telafer û li vir wê ji malbatê wê vediqetînin. Bi hefteyan li gel jinên êzidî wê di Hepîsxaneya Badûşê de radigirin. Piştî wê derdixin dibin navenda Musilê. Huro destnîşan kir ku wan 9 mehan mîna koleyan dan xebitandin û pişt re jî wê û hevjînê bi peymanek bi DAIŞ’ê re tê kirin ku hûrguliyên wê nizane dibin Kerkûkê û li vir tên berdan. Huro ji zarokên xwe tu agahiyên zelal negirtiye û li gorî agahiyên îdia jê re hatine zarokên wê hatine qetilkirin. 

 

MA / Nazim Daştan