ŞIRNEX - Nûçegihanê Ajansa Mezopotamya Berzan Guneş ê nêzî 2 mehane girtiye, parêzerê çûn hevdîtina wî, diyar kir ku hin parvekirinên wî bi armanca avakirina “Pêşdarazê’ kirine dosyeya doza wî û banga hestiyariyê ya tevlîbûna danişîna Guneş a 7’ê Tebaxê, kir.
Nûçegihanê Ajansa Mezopotamya (MA) Berzan Guneş ê di 11'ê Hezîranê de dema nûçe dişopand li nokteya kontrolê ya Polîsan a Şirnexê hatibû binçavkirin û li dadgehê jî bi “Îdîaya propagandeya rêxistinê kirin” hat girtin. Guneş ê li Girtîgeha Tîpa T a Şirnexê tê girtin dê di 7’ê Tebaxê de yekem car derkeve pêşberî dadgehê. Danişîna Guneş dê li Dadgeha Cezayê Giran a Îdirê bê dîtin.
Parêzer Engîn Kizilay û ji parêzerên Komeleya Xebatkarên Medya û Hiqûkî (MLSA) Zelal Pelîn Dogan ên li Girtîgeha Tîpa T a Şirnexê rojnameger Guneş ziyaret kirin, li bo tevlîbûna danişîna Guneş bang kirin.
MLSA Û IPI DÊ DANIŞÎNÊ BIŞOPÎN IN
Prz. Dogan, diyar kir ku rewşa Guneş başe û wiha axivî: “Ligel MLSA’a, dê Enstîtuya Çapemeniya Navneteweyî (İnternational Press İnstitute (İPİ)) dê beşdarî danişîna Guneş bibe û bi şopîne. Gelek rojnameger ji ber xebatên xwe yên pişeyî hatin binçavkirin, girtin û rastî êrîşan hatin. Mafê rojnamegeran tê binpêkirin. Rojnameger herî zêde mafê agahî girtina gel bi cih tînin. Êdî rojnameger gihane wê astê nikarin karê xwe yê rojnamegertiyê bikin û tên astengkirin. Erka me hemûyan ewe ku em piştgiyek mezin bidin wan. Weke MLSA em ê şopdarên rojnameberên girtî, kesên nikarin bi awayekê azad ramanên xwe îfade bikin û hemû binpêkirinên mafan bin.”
PARVEKIRINÊN WÎ HEMÛ NÛÇE NE
Parêzerê Guneş Engîn Kizilay jî, anî ziman ku di îdîanameya Guneş tenê, nûçeyên ajansê yên li ser medya civakî û lînkên nûçeyên hin nivîsan parkiribûn cih digirin. Kizilay, da zanîn ku ji derveyî parvekirinên nûçeyan tiştek din di doza Guneş de tuneye û wiha got: “Dozger hin peyvên di parvekirinên nûçeya de weke ku Guneş nivîsandibe, daye nîşandan. Ligel ku diviya bû di îdîanamê de cih negire jî, lê weke delîl di dosyayê de hatine nîşandan.”
PARVEKIRINÊN ENDAMÊN HILBIJARTINÊ JÎ DI DOSYEYÊ DE CIH DIGIRIN
Kizilay, bal kişand ser parvekirinên Guneş ên di medya civakî de û wiha got: “Di dosyeya Guneş de ev parvekirinên wî cih digirin. ‘Bajarê min ê xweşik Îdir ji sedî 65,14 Na ye’ û ‘Di serî de Hevseroka Şaredariyê Îdirê Şaziye Onder û hevalên me yên hatin hilbijartin, hatin girtin.’ Armanca van hemûyan ‘Pêşdarazê’ di dosyeya doza de avakirine. Ev binpêkirinek mafiye.”
Kizilay herî dawî, diyar kir ku ew hêvî dikin ku dadgeh li gorî qanûna bingehîn û sînorê navneteweyî yê bê alî biryarê bide û bang tevlîbûna danişînê kir.