Li Efrînê endamên Artêşa Azad a Sûriyeyê (OSO) yên girêdayî Hêzên Çekdar ên Tirkiyeyê (TSK) her ku diçe zor û zextê li ser gelê Efrînê zêde dikin. Her carê fesîleyek dikeve nava xebata dizî, talankirin, kuştin, îşkence kirin, xirakirin, tecewiz  û şewtandinê. Êdî gel ji kiryarên wan bêzar bûne û serê her gavê di nava tirsa kuştin, revandin, îşkence kirin û tecewizê de dijîn. 

 

Vê carê  endamên bi navê Cebhe El-Şemiyê li ser kar in. Derket holê ku di 22’yê tîrmehê de bi ser gundê Çeqela ya navçeya Şiyê de girtin û 30 kesê ji jin, ciwan û rûsipyan pêk tên ber bi aliyên nayên zanîn ve revandin. Ji malbata her kesekî/ê 3 hezar dolar xwestin. Di encamê de malbatên 13 kesên ku fidyê dan îro hatin berdan. Lê hat diyarkirin ku malbatên 17 kesên ku derfeta wan a fidyeyê bidin nîne, nehatin berdan û tê gotin agahî ji wan nayê girtin û jiyana wan di xeterê de ye. 

 

‘YÊN FIDYE NEDE WÊ BÊN KUŞTIN’ 

 

Ji malbata Ehmed Bekir ku bi riya telefonê ji me re ragihand der barê bûyera revandinê de wiha got: “Di 22’yê tîrmehê de di saetên sibehê de çeteyên El-Cebhe El-Şemiyê bi ser gund de girtin û ji her malekê kesek an du kes girtin. Di nava wan de keçên ciwan jî hene. Me nedikarî biaxivin ji ber ku çek di destê wan de bûn û em tehdîd dikirin. 30 kes ji jin, ciwan û rûspiyên gund revandin û ber bi aliyên nayên zanîn ve birin. Piştî revandina wan bi 3 saetan bi riya telefonê ji bo her kesekî/ê 3 hezar dolar fidyê xwestin û gotin kesên ku malbatên wan fidyê nedin emê wan bikûjin û hun jî wan ji bîr bikin.”

 

‘ÎŞKENCE LI ME KIRIN’ 

 

Yek ji kesên ku hatine berdan bi navê X. E. ji çavkaniyek ji herêmê re wiha ragihand: “Piştî ku bi ser gund de girtin em xistin ereban û çavên me bi paçên reş ta ku em tiştekî nebînin girêdabûn. Maşîne nêzî saetek û nîv meşiya. Di hundir maşîneyê de telefon û her tiştên bi me re ji me stendin û heya em gihan cihekî ku nayê zanîn li me didan û dijûnên pir xerab dikirin. Dema em gihîştin çavên me vekirin. Cihê ku em tê de bûn bin erdê bû. Piştî nîv saetê yek ji endamên wan hat û numereyên malbtên me xwestin. Piştre jî pênc kes hatin û dest bi lêdan û îşkenceya me kirin.”

 

Li gorî ku X.E. ragihand di dema îşkencê de di saetên destpêkê de Heyder Hec Heyder Momed her dû destên wî şikestin û got kesên ku heyanî niha li gel wan di bin xeteriya kuştin û tecewizê de ne.

 

17 KES WINDA NE

 

Navên17 kesên hatin revandin û hêj jî nehatine berdan wiha ne: 

 

Ebid El-Rihmen Xelîl Mustefa, Mihemed Xelîl Mustefa, Elî Daxlî Çûçik, Edanan Daxlî Çûçik, Mihemed Hesen Erselen, Ehmed Hesen Erselen, Hesen Enwer Usmen, Bêrem Ebdo Kalo, Bedriyê Ebid El-Rihmen Hesûn, Bêrem Heyder Xezo, Xelîl Tahêr Erselen, Ehmed Bekir Mihemed, Keça Ehmed Bekir Mihemed, Conik, Idrîs Ehmed Mustefe, Xelîl Ehmed Mustefa û Heyder Hec Heyder Momed

 

MA - Erdogan Altan